南亞?東南亞發生驚天大海嘯，死人無數，哀鴻遍野，世界各地及香港一齊發動捐款救災，理所當然。捐錢之事，存乎一心，左丁山呼籲各界捐款，但係反對點名要他人捐款、捐幾多。國家與私人唔同，美國最初話捐款三千五百萬美元，被批評為孤寒，後來了解到事態非常嚴重之後，為咗保持世界一哥嘅地位，唔想俾亞洲第一富國日本領先太多，於是捐款加碼到三億五千萬美元。私人方面，跨國公司固然紛紛捐款，但冇引起競賽。香港以李嘉誠基金會捐得最多，捐咗二千四百萬元，之不過，如果因此而大聲嗌乜乜地產商點解你唔捐，或者捐得咁少呀，此則不必，香港係自由社會，最好唔用群眾壓力，逼人做事。
一月一號賽馬，幾位馬主一齊去沙田，車上聽港台賽馬節目，因阿叔董驃講馬夠晒過癮，好好聽也，驃叔話自己揸二千蚊入場，入場即捐一千（當日馬場有救災捐款活動，馬迷捐一蚊，馬會畀多一蚊，上限一千萬元），剩番一千蚊就買晒第一場一號「天行者」（馬主趙式明，趙世光之千金）獨贏，因為驃叔對呢隻馬信心十足，贏面甚高也，如果輸咗，驃叔就成日齋講馬。入到場，馬主L立即撲去沙圈睇馬，望真隻一號「天行者」，認為隻馬唔夠氣勢，於是唔跟驃叔落注。
驃叔熱情，值得鼓掌，但跟住就過咗火位，驃叔話馬會有陰囊，冇智囊，點解唔捐夠一百億，以名留青史？陳華棟話：「馬會都要睇數啫。」驃叔鬧陳華棟正一廢柴，阿棟哥又好老脾喎，之後唔出聲。馬主L、馬主H等聽咗為之失笑，馬會收埋唔係真係有咁多錢，一年投注額七百五十億元嘅話，馬會收入約四十零億，扣除營運費用，撥款做香港慈善用途，好多本地志願團體要用呢筆錢，剩番得幾多呀？何來資格捐一百億元呀？真係挖儲備嚟捐咁多錢，張超雄議員會組織社工去示威抗議都似，正是罵人須有理，驃叔出於義憤，一時火遮眼啫啩？