早排美國豪放女星ParisHilton同前男友RickSaloman終於解決咗色情影帶嘅鬧劇，Paris決定唔告佢，但係就要收番影帶銷售得嚟嘅部份收入，至今呢盒帶據知已經賣咗接近五十萬套，相信Paris真係賺唔少。不過當佢睇到啲店舖出售佢套色情小電影，竟然都會睇到扯火。
事緣上個月十五號下晝，Paris同佢啲朋友入咗洛杉磯日落大道一間叫「SwingNews」嘅書報攤，諗住買啲八卦雜誌睇吓。一個店員事後話：「佢原本好好心情，重同我合照㖭，但係當佢諗住畀錢嘅時候，見到我哋舖頭嘅成人雜誌區賣緊佢隻色情ＤＶＤ《1NightinParis》，佢即刻由友善變到發晒狂。」據聞Paris係因為擔心fans見到隻DVD會對佢有負面印象，而且亦覺得好似俾呢間佢成日幫襯嘅書報攤出賣咗。
個店員為咗平息佢嘅怒火，嘗試將啲ＤＶＤ放喺隱蔽嘅地方，但係當Paris見到書報攤入面貼咗呢套戲嘅海報嗰陣，佢就即刻發癲撕爛啲海報，重攞咗隻ＤＶＤ塞入自己個手袋，然後大叫：「我𠵱家攞咗佢！我唔會畀錢買！」事後店員即刻報警表示舖頭遭偷竊同破壞。
相隔六日之後，一個影迷攞住Paris張色情相畀Paris簽名，原本笑容滿面嘅佢即刻撕爛張相上車走咗。我羅拉覺得，早知今日何必當初？