東鐵尖東站通車，市場人士一致看好嗰區前景，預料租售價向好。不過，有部份尖東租戶，竟然喺呢個時候至搬去尖西。
屋之島董事李思博話，最近有幾宗尖東租客搬去尖西。原本租用康宏廣場逾六年嘅美資手袋生產商，剛剛租咗尖西港威大廈康聯亞洲大廈二十二樓逾萬六呎樓面，呎租逾二十二蚊。
另尖東持有自置物業嘅本地製衣商亦租用港威第六座三十八樓逾九千呎，呎租逾二十三蚊。一本地生產商，就由尖東南洋中心搬去港威一座三十四樓。
李思博話，由尖東搬去尖西，都係同製衣業有關嘅公司，因為今年起，美國全面取消入口紡織製成品配額，刺激呢行擴充。而且尖東少大樓面供應，租客擴充，便要他遷。當然，尖東租金急漲，令到同尖西嘅距離拉近，吸引租戶搬去好啲嘅商廈。
華懋集團龔如心，較早時以王德輝先生夫人名義，捐咗五百萬，為南亞賑災，噚日宣布加碼。
華懋售樓部經理吳崇武話，已經開始向集團旗下商場、寫字樓、工廈同埋住宅嘅租戶同住戶募捐，佢哋每捐一蚊，集團會再以王德輝先生夫人名義捐多一蚊，上限五百萬。呢個籌款活動，去到聽日就截止。
吳崇武話，集團旗下有超過二萬個住戶，連埋租戶以及公司員工，為數唔少，籌到嘅錢，會交畀政府，然後再分配畀五個慈善機構，幫助有需要嘅災民。
本報報道過，去年二手交投成績，有心水清讀者來電，話愉景灣應該上榜。
經蘭西查證，佢果然入到十大（見附圖），重以七百五十八宗，排第五。睇番呢十個屋苑二手流通比率，以新入伙嘅擎天半島，同元朗YOHOTown居冠亞軍，而愉景灣就以百分之十點零八排第三。
冇上榜嘅泓景臺原來二手流通比率都達到百分之十八點零八，可見新入伙屋苑好搶手。
買樓大件事，業權等資料梗要查清楚，但係夜晚做嘅交易，要第二日至查得，發現問題已經太遲。問題好快有改善，土地註冊處下月十二號實施中央註冊系統，統一九個註冊處，並延長時間。到時「綜合註冊資訊系統」網上查冊，服務時間由早上八時半至凌晨十二時半，年中無休。咁做地產代理實歡迎，不過，據聞代理行高層擔心冇掩雞籠，諗緊點樣防止前線員工濫用，重複查閱浪費資源。
嘉華集團成立五十周年，唔少慶祝活動，公司刊物都以金禧做封面主題，主席呂志和又撰文講感受。佢話，集團以石礦建材起家，後嚟涉足地產、酒店及娛樂，希望藉五十年經驗，與時並進，再創高峯。
刊物提到，集團周年晚宴時，頒發長期服務獎，蘭西發現，原來呂志和大公子呂耀東，已經加入嘉華二十五年，係當晚唯一一個攞到二十五年長期服務獎嘅員工，而五公子呂耀華，就攞到十五年長期服務獎。
有望成為今年頭炮新盤嘅西環泓都，陸續披露資料。因為有意先賣相連大戶，發展商提供有家具擺設嘅藍圖供參考。聽講，呢類大碼，區內供應唔多，而泓都成個屋苑僅得四十八套相連戶，面積千三及千七呎。
除咗提供相連戶平面圖外，發展商重標榜屋苑室內泳池。因為臨近海邊，住戶可一邊暢泳，一邊享受窗外海景，感覺好似游出大海。
泓都有機會今個禮拜五開賣。聽聞，永泰九龍站上蓋漾日居第五座，原本出租，將於今個禮拜五轉為出售。
電郵地址：
