大市噚日突然急跌近200點，睇落其實好肉酸，但澳門賭業股無視大市走勢，繼續炒到飛起。
好似拆細嘅英皇中國（2955）繼續造好，升13.72％，收3.275元。另世紀建業（079）亦升18.42％，收0.45元。
有時唔到你唔服，好多股仔趁呢個浪都能夠成功抽水，好似去年聖誕節，經紀陳曾提過做開股票的美建（335）亦可能涉足濠江，佢品題當時，美建股價只係1.27元左右，過年之後，股價升到1.61元，旋即噚日停牌，即刻搞批股。
經紀陳話，美建今次批股，操刀嘅又係早前為多間濠賭股批股的德資行，批股價在1.40元樓下，集資金額超過2億銀，作為發展澳門房地產之用。
另外，噚日股價急升33.78％，收9.9仙的協里（729），據講亦在收市後批股，每股作價8仙，但集資金額就細好多，只得千零萬。聽聞筆錢好似都係用嚟去濠江發展。
小初聽完，實在覺澳門概念股愈炒愈濫，再冇乜嘢好講，但本身就維持原則，一於有所炒有所不炒。
慕容小初