隔晚美股只係小跌，港股則唔多好睇，恒指散191點，跌幅除咗大陸股之外，屬於最大。泰國係海嘯重災區，股市反有1.6%進帳。港股未聞有壞消息，估計係回吐吓，恒指料可守穩萬四點。
恒指C輪4548：萬四若果守得住，買恒指C輪博反彈。昨日跌得最傷嘅係3602，收14.8仙，散21%，有半年期，溢價6.2%，槓桿率27.1倍（有效11.2倍），引伸波幅19.5%，呢隻可以細細注敲吓。
更佳嘅對象係4548，昨跌17%，幅度都好大。隻輪有3個月壽命，輪價16.7仙，溢價1.6%，槓桿率21倍（有效13.4倍），引伸波幅17.4%。買呢隻，同3602比較，壽命短3個月，有效槓桿率冇輸蝕，慳番4.6個百分點嘅溢價。4552夠鐘期同4548差唔多，兩者拍埋比較，4548靚啲。
滙控C輪4585：滙控（005）跌1元，一般滙控C輪跌5-7仙，啱數。滙控收131.50元，上月最低有兩日試過見129.50元，但收市最低都係130元，估計呢個位有支持。市場錢多，滙控始終係有料之股，下月28日派成績表，有得憧憬。
計數揀滙控C輪揸，4441壽命長兼且有少少負溢價，實係正選。用嚟炒，搏殺些少，則要4585，昨收46仙，跌6仙，5月初到期，溢價2.4%，槓桿率28.6倍（有效16.4倍），引伸波幅14.5%。如果正股忽然向上郁三兩蚊，揸4585得大槓桿率之利，賺到笑。
中企C輪2204：國指散1.4%，中企指數C輪2204大散19%，創新低。
隻輪月底夠鐘，輪價7.3仙，溢價0.6%，槓桿率20.8倍（有效16.3倍），平水咁滯，波幅頗大，低位細注博反彈。
章盛