許志安同葉德嫻合唱嘅《美中不足》至今依然引起樂壇爭議，佢以「特別鳴謝」嚟解釋葉德嫻嘅合唱部份，呢首歌就作為佢一人歌曲計算，大有取巧之嫌。日前李克勤明潤安仔玩呢招牌章高，亦有報道話就連佢嘅死黨梁漢文都睇唔過眼，為呢件事同安仔不咬弦。
前晚梁漢文約咗蘇永康喺跑馬地嘅表哥茶餐廳食飯，蘇永康重帶埋阿媽出嚟開餐，但就冇預安仔份，佢哋食咗成個幾鐘至離開，康仔走時同阿媽有講有笑。
而另一邊廂嘅安仔，前晚先喺銅鑼灣出席歌迷活動兼舉行慈善拍賣賑災，跟住就去紅館睇陳慧琳演唱會，之後再去尖沙嘴嘅茶餐廳同司機食消夜。佢喺茶餐廳見到記者時，一邊煲住煙一邊主動坐埋記者身邊，猛話啲雜誌成日亂寫嘢砌佢，報紙好睇得多。
對於被克勤潤佢一事，安仔喺歌迷聚會上就話唔覺克勤寸佢，反而覺得克勤撐佢，又話贊成頒獎禮完結後，全部歌手出嚟食餐飯，邊個發起都冇所謂，既然安仔有咁好嘅提議，不如就由佢主動發起，睇吓有幾多歌手會出席支持？
喻可欣日前出書《情海星空─我與劉德華》，大爆同舊愛劉德華嘅情史同性史，外間指佢出書為咗賺錢，不過喻媽媽就唔同意呢種講法，佢重力撐愛女話：「我們家在內地、美國和香港都有房子，我家的錢可以養女兒一輩子，不用靠劉德華賺錢。現在他躲在一旁，劉德華還算一個男人嗎？」
楊千嬅噚日接受港台訪問，原來佢前晚去咗睇陳慧琳（Kelly）嘅演唱會，點知睇到encore嗰陣忽然被工作人員叫離場，佢走咗之後先知話有炸彈疑雲，千嬅話：「人哋睇到興高采烈，Kelly個演唱會真係好好睇，重諗住佢握手嘅時候同佢揮手㖭，邊個咁鬼唔好心地，做埋啲惡作劇。」
港台DJ鄧慧詩噚日被人喺香港電台附近嘅外牆用紅色噴漆寫上詆毀字句，記者噚日問佢呢件事時，佢話：「近年我俾同一個人電話騷擾，對方一時話要殺死我，一時話同我攬住死，我已經先後報過三次警，我唔知今次係咪同一個人所為，但我可以同大家講句放心，我冇事。」
吳文忻前晚喺佐敦一間的士高為南亞海嘯災民籌款，吳文忻話出席籌款活動比去《我亞媽發仔瘟》首映更有意義，佢話：「今晚嚟呢個活動有利是收，我都會捐番出嚟。以前喺美國讀書識得一名印尼華僑，同佢失去聯絡，希望佢冇事之餘，都唔會受排華牽連。」
