由人氣男星權相佑、延正勛及女星金喜善合演嘅韓國ＭＢＣ電視台重頭劇《悲傷戀歌》，聽日將會喺韓國播出，相信唔少韓劇fans都好心急，等緊睇呢套劇。韓國ＭＢＣ電視台今次落重本，除咗請嚟兩位巨星權相佑同金喜善演出外，又遠赴紐約取景，重投資咗一千多萬港元興建劇中拍攝用嘅別墅，單係製作費就已經超過五千萬港元，真係唔嘢少。
電視台就話唔擔心會蝕本，皆因日本富士電視台早排以約三千萬港元買咗播映權，而其他亞洲地區包括中國、台灣、香港、泰國等都願意以一般韓劇嘅兩、三倍價錢嚟購買版權。不過製作人估計劇集播出後，價格會更高，所以除咗日本之外，佢哋暫時都冇賣個版權去其他地方。另外，製作人計劃推出三張《悲》劇嘅原聲大碟，收錄主題曲同埋三位主角所唱嘅插曲。電視台方面重充滿信心，認為《悲》劇帶嚟嘅經濟效益一定可以超越由韓星裴勇俊及崔智友主演嘅《冬日戀曲》，成為亞洲最出名嘅韓劇咁話。
而金喜善早前就喺《悲》劇嘅網頁上留言，話對於喺劇中首次扮演失明歌手，擔心會做得唔好。有網友認為金喜善喺電影《飛天舞》同劇集《金粉佳人》中嘅演技麻麻，未必可以演繹好呢個角色。
另外，《悲》劇噚日喺漢城一間酒店舉行試映會，權相佑話雖然好友宋承憲辭演此劇，但佢仍然對呢套劇充滿期待。