喺韓國紅到爆燈嘅偶像男歌手Rain，今個月嘅二十九號同三十號，就會喺漢城舉行佢嘅處男個唱，兩日夾埋一萬張門券，一早就已經賣晒，據主辦單位話，當中有成三千張門票，係由嚟自亞洲各地嘅fans購買，即係表示佢有唔少韓國以外嘅fans支持。 此外，拍完劇集《浪漫滿屋》之後，Rain最近又喺當地一個電視喜劇中客串，一於再過吓戲癮。