新年首個交易日，成交雖然唔大，而大市亦不過升咗7大點咁大把，但澳門賭業股就大出風頭，就算只係講吓或者會在澳門投資遊戲機生意的軟庫發展（648）股價亦可以勁升56％，收0.128元，成交金額有成1.64億元，睇見都覺得瘋狂。
至於搞緊供股的英皇中國（296），自從上周公布業績由虧轉盈同埋除權後，股價已經急升，噚日再升38.46％，收28.80元，成交股數有成152萬股，金額3984萬元。
經紀陳話，英皇中國每手金額相當大，根本唔係一般散戶玩得起，可能等佢完成1拆10拆細之後，先至見真章。
至於英皇中國阿媽英皇國際（163），昨日亦勁升22.89％，收18.25元，成交股數446萬股，金額7674萬元。江湖傳聞英皇國際會在阿仔完成供股後冇耐，自己亦會搞一次批股集資，而涉及金額唔係細數目。
由於兩隻股份一齊拆細，所以今日開始會在臨時版面買賣，雖然計落銀碼細咗，但每手股數相應大咗，所以每手成本仍然唔細。
慕容小初