港股05年總算有個好開始，恒指初段雖曾跌過80點，最終仍升7點，收14237。期指亦升17點，收14255，皆以紅盤高收。
其實如果滙控（005）表現稍為好啲，港股噚日唔會升得咁驚險，大部份銀行股皆升，惟獨滙控好似未瞓醒，最多跌過1.50元，低見131.50元，午市雖有起色，但最終仍要跌1個位，收132.50元，拖累恒指唔見17點。不過，趙飛雲始終對滙控有信心，尾市見滙控Call輪4441溢價收至只得0.02%，在0.86元買入10萬份，博大笨象今日瞓醒，帶領大市再升。
事實上，港股短期能否再上，真係要睇滙控表現。滙控11月中在136.50元以小雙頂回落，而12月中在129.50元出現小雙底後，沿着50日線（現處131.44元）緩緩回升，近期最高曾升至133.50元，受制於11月至今的短期下降通道，昨跌至50日線反彈。短期若能升破通道頂（下移至133元）及12月高位135元，可扭轉11月中至今1浪低於1浪的走勢，有機升破136.50元頂部，再展新升浪。
相反，若滙控繼續受制於通道頂及跌穿50日線，短線技術走勢將轉壞，下試小雙底129.50元及通道底支持（現處128元水平），若通道底失守，及跌足量度跌幅（約5元），已足可帶動港股展開一次較大調整，而揸滙控Call輪會輸得好傷，所以滙控跌穿50日線，滙控Call輪宜先計數。
首都機場（694）仍是關前徘徊的走勢，降軌下移至3.30元，首機昨亦退1格，收3.275元，另方面，50日線亦上移至3.125元水平，將現突破走勢，到時伺機買入。
趙飛雲