今季多咗個「X先生」（X係和波標記）花名嘅國際米蘭教練文仙尼，已接到上頭命令，準備進行大清洗，陣營內人人自危。據講各球會準備隨時接收呢啲國米棄將，祖雲達斯卡比路早前就話：「佢哋有咩唔要嘅『剩餘物資』，記得留畀我。」
據了解，國米呢個月好可能會將名氣大但表現唔好嘅球員出售或外借，名單包括戴維斯、馬達拉斯、列高巴、告魯斯、尹達美迪同埋卡拉古尼斯等等。由於近年唔少離開國米嘅戰將，去到新球會通常脫胎換骨，今季被棄用後加盟祖雲達斯嘅簡拿華路就係最佳例子，所以各隊都密切留意國米「放盤」情況。
第二隊唔敢講，其實祖記兵源充裕，未必用得着國米棄將，卡比路今次咁講，擺明係揶揄國米唔識用人，多過真係想招兵。
放假開心，但都要講紀律，好似波圖嘅巴西兵放完假後遲歸隊就抵鬧。話說波圖本來定咗上周五復操，但戴亞高、比比、達里同埋馬斯路都無現身，據報後者返祖國發生意外，情有可原；但其餘三個就響前日至報到，遲足兩日，結果球會當日唔畀佢哋跟操，怕且之後重有其他懲罰。
錫菲聯早前用約十五港元簽咗郝海東後，日前更一口氣簽咗三名成都少年隊年輕球員，等佢哋喺英國接受培訓，如果將來錫菲聯從三名球員賺到轉會費，成都亦會分帳。中國無緣打入世盃決賽周，中國球員喺歐洲球壇價錢低咗好多，唔少都暫時唔考慮，錫菲聯反行其道，唔通有計？
曼聯前鋒兵源短缺，連借到比利時安特衞普嘅董方卓亦要歸隊？非也，只係董方卓趁比利時聯賽歇冬，返回奧脫福畀曼聯軍醫了解吓足踝傷勢，據初步判斷應該問題不大。董方卓今次返奧脫福，重同一批傷兵好似布朗、沙夏等一切接受治療，分享心得，算有收穫。
近年潮流興老將鳥倦知還，重要係返母會效力，繼蘇拿同埋迪肯尼奧之後，前英格蘭國腳費迪南日前就同保頓解約，可能重投英冠昆士柏流浪懷抱，不期然令我求大俠諗起十幾年前睇昆士柏流浪有費迪南同加倫等名將嘅日子。加倫家陣重踢緊流浪，佢同費迪南有機會故劍重逢。