新車速報：明撼寶馬平治轎車<br>低價高檔豐田MarkX

新車速報：明撼寶馬平治轎車
低價高檔豐田MarkX

日本豐田最新MarkX車系，被外界視為抗衡歐洲一線汽車品牌寶馬5系同平治E-Class的新武器，除車架用上同廠至頂級的Crown系列之餘，傳動系統重用上極具跑格的FR布局，而剛抵港的MarkX250G，更用上一台輔有D-4直接燃油噴注的2.5公升V6新引擎，不僅車價比同級車便宜一截，輸出亦較一眾同級突出，還有一身原廠Modellista大包圍配襯，內外都咁有睇頭！

記者、攝影：陳偉林　ImageGirl：Zoe

D-4噴注輸出平均

去年底前，豐田至新至頂級的MarkX300G抵港，筆者經已第一時間作實地測試，事隔未及半月，另一款MarkX250GModellista匆匆到埗，雖然改換上2.5公升V6引擎，無疑輸出少了一點點，但實試中發現附有D-4直接燃油噴注設計，令每段輸出平均外，中、低轉扭力表現亦好突出，配合埋6前速半自動波箱，起跑加速有力又暢順，而二段式電子懸掛欠奉下的標準裝置，吸震柔韌有力，彎道表現又見平穩，完全凸顯出另類FR轎跑車特色。

■短桿式6前速半自動波箱，轉檔反應敏捷，每段輸出平均。

車尾選用F1導風翼

再講，加有一套原廠Modellista大包圍的MarkX250G，線條變得圓渾流暢之餘，車頭布局亦極具跑意，尤其係左右一對三聯Xenon頭燈組合，格外有神；其次，車尾電鍍雙出式尾喉之間，還置有取材自世界一級方程式跑車的穩壓用導風翼，匹配埋Modellista版特製尾翼，對於這輛MarkX在造型同高速馳騁下，確實起有莫大幫助。

■電鍍雙出式尾喉之間，另備有Modellista製穩壓用的導風翼。

前排鑲有絲絨跑桶

雖然車廂鋪排夾雜着桃木修飾，但仍難掩本身一份跑意。前後兩排以高級絲絨鑲嵌，難得前排更屬意為跑車的仿桶椅設計，剪裁貼身富承托感。再者，尾箱格外顯得闊落之餘，尾排椅背遇有需要，重可以收摺平放。此外，內櫳設備還包括上乘的高級CD音響及左右獨立恒溫冷氣，當然少不了還有前後獨立照明。

■前排以跑車仿桶形座椅組合，剪裁貼服之餘重有電動腿墊，舒服！

三圓頭燈帶起跑意

■專用Modellista橫柵式鬼面罩，配襯埋一體式氣霸極具剛勁美。

■全新三圓Xenon頭燈裝置，實用得嚟更有型。

■加有方向燈的門邊電鏡組合，既吸引又時款。

■Modellista版特大尾翼配搭，令這輛轎跑車不失典雅一面。

■低腰線設計的車尾箱，提存既方便容積更大。

■獨立圓尾燈組合，份外清晰奪目。

貴氣內櫳簡約格局

■車廂陳設盡見豪邁貴氣本色，營造有簡約的豪華轎車格局。

■引擎採用KeylessGo插卡，再按電掣啟動，夠High-tech。

■鑲有銀白電鍍面的中控台，CD音響及獨立恒溫冷氣設備，其下重有頗大的雜物匣。

■鑲有銀白框邊的液晶表板鋪排，易於閱讀。

■有需要時兩邊椅背重可以放平，方便直接從尾箱提存物件。

ToyotaMarkX
250GModellistaSpecifications

引擎：2499ccV6DOHC
馬力：215ps/6400rpm
扭力：26.5kgm/3800rpm
傳動：6前速半自動波，後輪驅動
懸掛：（前）雙搖臂（後）多連桿
制動：（前）透氣碟（後）碟式（ABS）
輪胎：215/60R16YokohamadB
尺碼：4730×1775×1435mm
軸距：2850mm；車重：1510kg
平均耗油：12.6km/L（日本10.15模式）
車輛提供：富利堡汽車（28772700）

■豐田MarkX屬後輪驅動，單睇車身已經覺得好有豪華轎車風格。

其他轎車推介
寶馬525iA

點睇：一輛包裝前衞出眾兼具跑車個性的豪華轎車，採用一台2.5公升直6引擎（馬力192匹），配套設備齊全。
車價：$565,000

積架S-Type2.5

點睇：典型高級轎車作風，用上一台2.5公升V6引擎（馬力201匹），座艙鋪排出色兼有突出的行車演繹。
車價：$418,800

平治E240

點睇：造型一直被視為汽車潮流指標，採用2.6公升V6引擎（馬力177匹），車廂陳設豪邁兼有不錯的操控反應。
車價：$468,000