激平影相手機$1,880玩盡5大功能

呢期手機最潮最興嘅功能，都不外乎影相、插卡、靚芒、聽MP3，或者玩埋3D立體鈴聲，要一部機有晒以上功能，冇三千蚊都落唔到樓。之但係幾時都話祖國勁，呢部稱為「GoldenAge」嘅手機，集合晒以上所有功能之餘，重要送多張32MBT-Flash記憶卡，都係收你$1,880，再加上一身三星E708嘅造型，真係唔到你唔服！

記者、攝影：劉耀祥　
ImageGirl：Wendy

呢一部名為「GoldenAge」嘅手機可謂一部六神合體嘅機種，意思並唔係話佢係「鬼機」，由幾部機合成為一部機，講嘅只係佢嘅外形及功能。首先睇吓個外形，可能廠方認為三星E708太過經典，又或者想向佢致敬，所以樣似不在話下，為咗再「原汁原味」，就係連型號都叫做E708+，真係服到五體投地！雖然話就話E708+好似三星E708，但係功能上，E708+比E708強得多，加入近期手機界新寵功能之3D鈴聲，所以機身左右兩側都有個超大喇叭，唔係淨係來電先有聲，就算開機熄機、打開部機閂埋部機，都一樣有聲，將3D音效完全用到盡！

■無論外觀同體積，同三星E708（左）都非常相似。

內置T-Flash記憶卡槽

E708+由外形至功能都係集眾家之大成，除咗個「三星機款」以及韓國3D鈴聲之外，最令人驚喜就係機仔細細，兼且喺價錢唔使二千蚊嘅情況之下，竟然玩埋Motorola另一強項──內置T-Flash記憶卡槽，即時令E708+嘅抵玩度三級跳。最大可以支援256MBT-Flash記憶卡，隨機重送埋32MB卡及SDAdapter，一個「抵」字講晒！用上記憶卡，最直接受惠嘅當然係MP3播放功能，加上其內置雙喇叭，音量絕對唔講得笑，開到盡直頭可以拍得住部小型收音機。不過E708+聽歌質素只屬一般，最好都係戴番個隨機附送嘅耳筒聽歌，否則歌聲「拆」親隔籬就唔係幾好喇！

■隨機唔止送32MB卡，重送埋SDAdapter，極度抵玩。

30萬像素影相鏡頭

E708+開價$1,880，已經可以播放MP3、加埋6萬5色彩芒、3D鈴聲、MP3鈴聲，以及64和弦，夠未？梗係未，再畀埋個30萬像素影相鏡頭你，邊個話一分錢一分貨。而且拍攝質素亦唔係求求其其，就算全螢幕拍攝反應都流暢，冇窒窒吓都已經可以收貨，重有懷舊、黑白等幾款特別效果，以及五連拍功能，以價論機真係超級抵玩。不過都唔係一味得個讚字，E708+都有不足嘅地方，就係外芒雖然係彩芒，但係冇得玩自拍，影相又一定要㩒機側拍攝掣，就唔係咁方便喇，最可惜係現時只有簡體中文版，對香港用家就唔夠親切，收SMS隨時都會走幾個亂碼出嚟！

■全螢幕影相效果合格，流暢度同畫面都交足功課。

■就連「內櫳」設計都似到十足十E708，真係「有心思」！

新機四圍Look

■外芒只係睇吓時間同來電顯示，唔可以玩自拍。

■全圖案功能選單算係做得唔錯，只係啲公仔核突咗啲。

■除特別效果之外，連拍亦都有得設定，好多貴機都未必有。

5大至熱賣點

1.30萬像素鏡頭

■千零蚊買MP3都未必夠，重要有埋30萬像素鏡頭。

2.T-Flash卡槽
■機身已經唔算大，重可以整多個T-Flash記憶卡槽，勁！

3.立體聲雙喇叭
■機身兩側各有個大喇叭，好似韓Phone咁玩埋3D鈴聲。

4.MP3鈴聲
■播放介面可即時將MP3音樂，轉換成來電鈴聲。

5.播放MP3音樂
■鍵盤設有MP3快速播放鍵，一㩒就即時可以有歌聽。

profile

制式：GSM900/1800雙頻
外芒：4,096色
內芒：6萬5色（128×160像素）
鏡頭：30萬像素
功能：64和弦、MP3播放/鈴聲、紅外線、GPRS、3D鈴聲、T-Flash卡
備用時間：240小時
通話時間：180分鐘
體積：92×45×25mm
重量：90g
查詢：23800316（紅星電訊）