噚日記者會已經較原定時間遲半小時開始，點知威廉絲喺記者會開始約五分鐘先到；威廉絲事後解釋當時做緊物理治療，大頭蝦唔記得記者會時間，要大會工作人員通知先醒起，大威重話自己一向好守時，今次只不過一時大意，猛向記者saysorry㖭。
上年協會盃女子網球賽，俄羅斯雖然冇新貴舒拉寶娃參加，一樣擊敗法國攞冠軍，事後更引發部份俄羅斯球手杯葛舒拉寶娃傳聞，話佢一年冇幾多個月喺祖家；不過記者會所見，舒拉寶娃同坐喺旁邊嘅同胞古絲妮索娃有傾有講，又唔多似杯葛喎。
外國球手一向好注重禮貌，好似記者會之後嘅訪問舒拉寶娃途中，有兩次記者手提電話響起，舒拉寶娃立即停止發言，眼定定望住個記者，好似有啲不滿。