收到讀書聚會預告，發覺施永青果然多才多財多藝，除咗人所共知嘅自己買樓投資發達、代客買賣樓宇致富之外，重讀書多過人。呢位非大學畢業生富豪（一早講過，大學畢業生好少係巨型富豪）會喺二月五日在「城中讀書會」晚上七至九時講馬基利斯、沙岡《性的歷史》，地點就係中環美國銀行中心一樓A中文大學校外進修學院演講廳。
老施以前講過孫子兵法、老子無為之學，又在《蘋果》論壇版寫過佢支持長毛梁國雄，對馬克思、托派有一番研究。哈，佢原來對《性的歷史》都咁有研究，以佢讀書之多之廣，直情係資本家嘅典範，何況佢又係香港小交響樂團主席，支持文化，直情係出錢又出力。大家如果聽慣施永青講地產市道、豪宅走勢，到時有空，不妨去美國銀行中心聽佢講沙岡《性的歷史》。
左丁山有一次問佢中原地產猛咁開舖，究竟係乜嘢策略，如何防止過份膨脹，尾大不掉？老施答得真妙：「我冇理㗎，下面話開咪開囉，總之我要佢哋交到數，一路開舖開到新舖蝕本為止，你知啦，經濟學講MR=MC，就達至均衡狀態，一日MR大過MC，我都畀佢哋開新舖㗎，新舖蝕本即係表示MC大過MR，梗係要收手啦。」（MR係邊際收益，marginalrevenue；MC係邊際成本，marginalcost）問你服咪？老施連個體經濟學嘅市場均衡狀態都識，活學活用，此亦符合佢相信嘅老子道家無為論，凡事唔好管咁多！
施永青有料有錢，無所恐懼或要擦鞋，所以當陳啟宗講「香港係中國最共產嘅地方」之時，佢就發言窒陳先生：「你哋啲資本家點解唔夾錢趕走自由黨（因自由黨代表唔到資本家利益），或者夾幾十億收買黎智英？」朗尼陳惟有答：「我哋要趕走嘅，係民主黨。」