踏入05年，濠股繼續會成為大眾追捧嘅目標，家吓有實質同有概念嘅濠股，不下二三十隻，相信仍會陸續有來。澳門咁大，酒店同賭場咁多，同賭業有關嘅周邊行業，又係咁多元化，特別係香港唔少上市公司嘅負責人或管理層，都曾經或做緊賭業，呢類公司染「濠」，亦係順理成章之事。濠賭股熱潮方興未艾，大家可繼續尋寶。
今日講1隻準寶藏股，就係結好控股（064），首先講佢最近嘅一連串動作，究竟有乜玄機？
結好最近公布，收購太平洋興業證券同逾10間金融服務公司，以及位於中遠大廈10樓嘅物業，總代價2.62億元，其中8000萬元將以年息3%之3年期可換股票據支付（兌換價1.30元），其餘8750萬元以現金支付，9450萬元係更替債務。
太平洋興業大股東係劉鑾鴻，若悉數兌換可換股票據，將持有6153萬新股，佔擴大後股本約17%，成為主要股東。
表面上，結好合併太平洋興業，係證券業為應付競爭的一次大型整合行動，收購有助提升結好在金融市場嘅佔有率，加強盈利能力，長遠對業務發展必有正面幫助。
睇深一層，其實，結好集團主席洪漢文（佐治洪）早與劉氏昆仲稔熟，在01年12月時，已夥拍劉鑾雄和龔如心入股聖母灣發展股份有限公司，加入競逐澳門博彩業的經營牌照，今次結好同太平洋興業拉埋天窗，唔排除係佐治洪同劉氏昆仲，或其他賭業人士會有進一步合作的機會。
講完表面因素，再睇吓佐治洪嘅背景，就知道最近有消息傳結好會變「濠」，雖然公司已聲明目前並無計劃收購一主要股東嘅博彩業務，但空穴來風，不會無因。
佐治洪在90年代初便沾手澳門賭業，係第1代澳門葡京賭廳經營者，早期主要接待台灣客，故取名寶島廳，當年只有14個賭廳，佐治洪已能分一杯羹，可見他在澳門既強且廣的人脈關係，隨着澳門概念股大熱，唔排除結好會透過幕後人的特殊背景，沾手賭業，在一眾濠股都已大升之際，結好實在值得高度留意。
郭兆誠