剛在無綫台慶奪得「我最喜愛的女主角」獎的黎姿，不忘行善積德，日前抽空探訪及捐助智障人士社區中心，她又定下目標，在三、四年內成立個人慈善基金，為社會謀福祉。
黎姿早前出錢捐助循道衞理楊震社會服務中心購買五部電腦，讓中心內的智障人士獲得學習使用電腦機會，她又到社區中心與智障人士見面交談及玩遊戲，並為該電腦室主持開幕儀式。
黎姿指智障人士經常被歧視，使他們未能獲得平等對待，她說：「我哋應該當佢哋一般人看待，佢哋其實識好多嘢，佢哋都唔想自己係咁。」黎姿續說：「我當年名氣冇咁大，影響力亦冇咁大，今次憑《金枝慾孽》得獎算好幸運，希望利用自己嘅名氣做善事，呼籲外界關注佢哋，而老弱傷殘亦係需要關注。」
黎姿的最大心願是成立個人慈善基金，她說：「藝人應該多做善事，因為收效事半功倍，呢個係我好多年想做嘅嘢，遲啲嫁人又好，唔做又好，都可以專心搞慈善基金，希望基金可以喺三、四年後成立。」
社區中心內二十多名智障青年，帶着興奮緊張心情與黎姿見面，她到場後與他們逐一握手，又一齊跳舞、玩遊戲。除了主持電腦室開幕，黎姿更親自講解如何操控電腦，一些智障青年更表示經常上網尋找有關《金》劇資料，又追問黎姿會否拍《金》劇續集。
大會安排智障青年向黎姿發問時，有人問黎姿有沒有男朋友，她笑謂：「希望快啲有。」對方卻追問：「係唔係洪金寶個仔？」令她尷尬大笑。又有青年指黎姿與林保怡非常合襯，但不想二人結婚，黎姿反問原因，該青年坦言：「因為我鍾意你囉！」黎姿高興之餘亦不知所措。
採訪：張俊銘 攝影：葉君海
