新年前收到十零封讀者電郵，其中一封來自Eddy，佢話最近左丁山寫過Valueformoney，應該係左丁山忙中有錯，要寫Valueforthemoney至啱。吓，唔係呀，自己日講夜講都係Valueformoney，點解有讀者話錯嘅呢？唔通自己啲英文差得咁緊要？
既然有好心讀者Eddy指正，連忙查字典，睇真啲。先查《蘋果》社長董橋都推薦嘅陸谷孫《英漢大詞典》。
內有一條Itwaspoorvalueformoney（譯：這件東西不值那麼些錢或很不合算）。再查朗文出版嘅《當代大辭典》（由陳善偉、陸國強兩位教授主審），內有一條Youalwaysgetvalueformoneyatthatshop（譯：在那家商店買東西很划算）。既有辭典為證，左丁山比較放心，讀者Eddy請你唔好嚇我。
另一位讀者Amy來英文電郵回應《中文唔難學》（十二月二十九日）一文，提出一個有趣觀點，就係如果父母逼（或極度鼓勵）子女學英語，輕視中文嘅話，子女嘅數學可能會曳咗（當然係指大體平均而言，唔係講個別現象），因為中文數字講一、二、三、四……十、十一……二十、二十一等等，可以逐「一」加上去，本身就包含有數學理念，反之英文講一、二、三、四係one、two、three、four……eleven、twelve，係要逐個字、逐個概念去「死記」嘅。與數學思維冇乜關係，中文人淨係念九因歌乘數表都易好多啦！Amy或者有道理，最近一個OECD嘅十五歲學生數學能力調查，香港名列第一，連《國際先驅論壇報》都要特別用此為新聞標題。之不過咁噃，華人以至亞洲學生啲數學係夠晒勁，但數學大國係法國，數學研究人員特多，數學雜誌都可以生存（見最近嘅《信報》高潔專欄），華人世界級數學大師之中，陳省身過身後，除咗邱成桐，重有邊幾位？左丁山係數學差勁之人，唔識。