南亞發生大海嘯，香港名人個個有驚無險，當中原來有位查大俠查良鏞。
八方聽聞查太因為未去過布吉，夫婦倆決定舊年聖誕去玩吓，咁好彩查大俠同佢太太都唔鍾意陽光與海灘，所以住咗喺山上較高嘅地方，大災難翌日，佢兩個就急急返咗曼谷，然後返港，呢次經歷梗係難忘之極。
而喺布吉有唔少投資嘅蘭桂坊之父盛智文亦身在當地，佢同《南早》講，佢嗰朝九點同個女目擊災難發生，當時佢哋正喺較高嘅酒店食早餐，第一個浪嚟，成個LaemSingBeach唔見咗，然後聽到尖叫聲；再嚟第二個大浪，海灘邊嘅酒店都冇埋，好似睇戲咁。佢個女急忙通知喺PP島一對新婚朋友快啲跑上屋頂，結果啲水浸到下巴停咗，所以唔死得，對新人嚇到即刻飛返墨爾本。
盛智文目前重留喺布吉施援手，蘭桂坊今晚有紀念同籌款活動，佢話當你親眼見過屍橫遍野嘅景象，乜嘢都可以喺五分鐘內消失，就明白到做人最緊要目標正確。
（圖）查良鏞夫婦喺布吉有驚無險。資料圖片
傳真︰2623-9278
電郵︰