印尼海嘯，港人捐款，掀起熱潮！雖然董團夥救港人反應癡呆，又俾國際社會恥笑，不過港人一片善心，捐錢以人頭收入比例計，唔輸蝕過英美幾多，證明港人唔需要一個廢柴政府，亦可以自動波，挽回面子！
海嘯過咗頭七，中外各國乘機玩政治！美國佬俾人喝一喝，即時追加捐款，全球名列第一，霸權即是霸權、大佬即是大佬，係囉，有財力，有實力，先至可以名正言順他日追剿邪惡軸心勢力㗎嘛！
中國當初自稱第三世界兼發展中國家，彈弓手，諗住側側膊，平時自稱甚麼世界經濟第二大實體，嗰鋪豪氣，要佢畀錢時突然冇晒！經海外輿論批評指正之下，溫寶亦知碇，即時補飛，話追加到五億！雖然同美國就冇得揮嘅嘞，始終冇咁樣衰！
不過，全球哀悼海難，取消元旦慶祝，北京就夠晒騎呢，竟然照樣舉辦元旦京劇「聯歡」晚會，壽爺及老江，竟然雙雙上台鼓掌亮相，喜氣洋洋，政治局九大常委，好離奇咁，淨係溫寶缺席喎！
人哋全球哀悼，佢北京就齊齊聯歡，中國永遠都同世界潮流打對台，呢樣一啲都唔奇，奇就奇在呢台聯歡戲，溫寶唔到，反為老江就照樣排頭位企中間，鼓掌力度一樣咁大，笑容一樣咁親切，而且喺台中央一企，嘩，大將之風依舊，重好有最高領導人嘅風範台型！咦，睇個樣，唐唐問鼎下屆特首，「餐屎」又瓜唔晒喎，喺香港嗰啲爭住打廢董落水狗、又猛啪針同唐唐猛打特首人工流產毒針嘅，好岳高個頭，睇真吓北京呢一幕嘞。
喺馬爾代夫一度失蹤又奇迹生還嘅震鷹哥一返特區，亦即時向曾灶財出招，佢話董團夥係時候成立一個災禍救人應變機制小組，並應由政務司司長做組長喎！
災變救人，有保安局局長、有警務處處長，重有中國駐外領事館，唔通呢幾瓣通通係廢嘅？
又質畀煲呔，唔通當咗煲呔係打雜，揸完掃把，揸西九龍支旗，𠵱家又輪到吹埋BB！唔怕曾灶財又試隻手遮天呀？真係好胡混啫係咪？
傳真︰2623-9278
電郵︰