蔡卓妍的愛犬朱古力昨日在人狗百萬行活動中大出風頭，阿Sa表示每次帶牠出街都被當作「假狗」，因為牠太似公仔，而周麗淇和陳淑蘭的愛狗雖然同是約瑟爹利品種，但size卻相差很遠，相映成趣。
蔡卓妍（阿Sa）、馮德倫、宣萱、周麗淇、阮小儀、陳淑蘭、呂頌賢等昨日帶同愛犬出席在陽明山莊舉行的「SAA人狗同樂百萬行2005」，不少巿民亦帶同愛犬出席，百萬行開始前，藝人先在台上舉行開步儀式，但由於花了很長時間，現場巿民一度鼓譟。
阿Sa的罕有玩具貴婦狗（ToyPoodle）成為全場最矚目的寵物，阿Sa說：「佢叫做朱古力，件衫係媽咪織嘅，我帶佢出街成日俾人當係假狗，因為佢太似公仔，佢喺日本訂返嚟嘅，價錢一萬蚊樓下。」
Twins前日在「叱咤」得了組合大獎，阿Sa表示前晚開心到瞓不着，之後她又突然自爆有人在家和她爭暖爐用，追問之下阿Sa就說：「我有個女仔同屋住，佢成日同隻狗爭住用個暖爐。」
而周麗淇和蘭子的愛犬都是約瑟爹利，不過一個是迷你品種，一隻是大種，身形相差很遠，周麗淇說：「我隻狗七歲幾，平時佢喺屋企都係食、瞓同屙，今日帶佢出嚟做吓有意義嘅工作，但都係我抱住佢行啫，之前我拍無綫劇《秀才遇著兵》練到一身好武功，相信都可以行畢全程嘅。」
呂頌賢和宣萱所養的都是混種狗，呂頌賢講起前日慈善步行樓梯賽時，因趕不及接棒，以致唐季禮行了十九層樓梯暈倒，他說：「本來我喺八樓接佢，但我跟住大會嘅人行咗幾次都搵唔到隊友，最後見到佢時，佢已經暈咗，我即刻扶住佢，可能大會最後先安排演藝人嘅行程，所以有啲混亂啦！」
採訪：卓寶花
攝影：陳慧安
