小初新年冇去遊行，唔係怕天氣凍到震，而係唔想香港呢個經濟城市變得更政治化，情願坐低諗吓有乜嘢炒好過。
經紀陳話，雖然濠江賭業股去年獨領風騷，唔少股份累積升幅驚人，但佢覺得呢個浪潮仍未玩完，應該重有一排熱鬧。另外，若喜歡刺激，唔怕大上大落，查理士．陳系股份可以留意。
查理士．陳系的德祥企業（372）旗下錦興（275）同埋保華德祥（498），可能出售中策（235），而保華德祥早前出售喺澳洲上市嘅Downer權益，套現唔少，重講過唔排除會派畀股東。
另外，同屬一系統嘅永安旅遊（1189）早排亦話收購澳門金域酒店權益，雖然即時反應差強人意，但江湖傳聞重有後着，據講係同佢旗下旅遊業務有重大關係。事實上，作為仙股嘅永安旅遊，亦係整系股份中，炒味最濃厚嘅一隻。
講嚟講去，就係呢系股份似乎搞緊重組，隨時有動作出現。
慕容小初