聖誕新年英國波開快車，對我哋呢啲睇波友嚟講，假期有足球為伴當然過癮，難為球員就踢到氣咳。連場激戰過後，愈來愈多球員瞓低，淨係計元旦日掛彩嘅名將就包括利物浦中場阿朗素、紐卡素前鋒比拿美、曼聯中場基斯坦奴同阿仙奴後衞蘇甘保等，佢哋正受唔同程度傷勢困擾。呢期賭波嘅真係要睇實啲軍情。
咁多球隊之中，以「紅軍」最當黑。領隊賓尼迪斯上任後，主將傷完一個又一個。至於「紐記」都唔好得去邊，比拿美對伯明翰勇戰受傷，暫時未知佢膝傷嚴唔嚴重。假如佢同舒利亞（次次話出都冇影）、古華特都一齊養傷，隊波就剩番最近帶住肩傷作賽嘅阿美奧比，領隊桑拿士唔愁至奇。
假如你問呢兩位領隊有咩新年願望，怕且都走唔甩係球員健健康康。
熱刺響前日元旦日大發神威，大勝排名比自己高嘅愛華頓，其中英格蘭小將馬尼表現好搶鏡。佢光芒四射背後，話說熱刺領隊祖爾曾經擔心後生仔元旦前會玩得太癲，特登喺凌晨打電話查探吓；當時馬尼個電話飛咗去留言信箱，祖爾心知不妙。點知幾分鐘後馬尼打番電話畀祖爾，話本來已經瞓緊覺做乖仔，抵佢之後嗰日對愛華頓踢得咁好。
曼聯後衞李奧費迪南守波穩就穩啦，但講到馭車之法就令人不敢恭維。英國《太陽報》近日就影到佢揸車時，曾經一隻手揸手提電話，另一隻就搞前面塊倒後鏡——即係無手揸軚盤，都咪話唔牙煙。喺英國揸車用手提電話係要罰錢，對於呢位高薪球星當然無咩所謂，問題係佢身為公眾人物，咁揸車法隨時教壞佢啲球迷，有樣學樣就唔知點算。
今季幾乎每場波都坐冷板櫈嘅中國球員王治郅，噚日喺NBA熱火隊大炒山貓嗰場波，終於有機會上陣，出場五分鐘入咗七分及兩個籃板，算幾威，難怪連隊友奧尼爾，都喺後備席向佢握拳致敬；雖然「大郅」大部份時間係喺垃圾時間出場，但喺新嘅一年，算係有好嘅開始，而且熱火十四連勝嘅紀錄，佢都沾到啲光彩，都唔錯啦。