印尼九級大地震引發南亞地區發生大海嘯，造成超過十二萬人死亡，日前遠赴災區斯里蘭卡拍攝賑災短片的杜汶澤昨日返港，他直言回家後見到自己的名貴鑽飾、金表及靚屋，感到十分折墮，因為災區的兒童連鞋也沒有。另一方面，昨晚舉行的「英皇慈善基金攜手送暖到南亞」，共籌得四百一十二萬六千八百二十元，捐給香港紅十字會賑災。
杜汶澤與助手昨日自海嘯災區斯里蘭卡回港，他身穿衞衣、短褲及拖鞋步出機場，面容略為憔悴，原來杜汶澤的鞋已送給當地的孩童，他說：「今次只係逗留咗四十八個鐘，時間唔夠，災區地方太大，當地嘅路爛晒，又落緊雨，坐車四五個鐘先去到一個災區，斯里蘭卡政府為咗防範泰米爾游擊隊埋咗好多地雷，海嘯後沖到周圍都係，所以好危險，我都冇諗過自己可以唔死返嚟。」
「好彩冇人搶嘢」
杜汶澤續說：「我對鞋捐咗畀啲細路，因為成條街都係玻璃碎，佢哋啲腳損晒，一對當然係唔夠啦，當地物資好短缺，但好彩冇人搶嘢，畀着係我哋嘅國家發生咁嘅事，一定冇咁好秩序，所以我都好欣賞佢哋。」
斯里蘭卡軍隊已清理好屍體，故杜汶澤此行並沒見到屍橫遍野的景象，他亦沒有戴口罩，他說：「我有帶口罩過去，但當地都冇人戴，啲災民成腳都係傷口，俾烏蠅摟住，如果我戴口罩感覺好怪。今次香港籌咗唔少善款，仍然係唔足夠，因為好快會用晒，要好長時期先會搞得掂。」
忠告栢芝「唔好死」
不排除會再到災區的杜汶澤，認為此行是入行以來最有意義的一次行程，提到張栢芝即將出發到印尼，杜汶澤揚言「好危險」，給她的忠告是「唔好死」，杜汶澤說：「我想同有關方面傾吓，因為災情比想像中嚴重，去賑災嘅人亦要知道危險性，千祈唔好低估，當地衞生情況好差。」
返回寓所後，杜汶澤即湧起內疚感，他在電話中說：「我見到間屋咁靚咁大，個心好唔舒服，我杜汶澤重使唔使用鑽石耳環同金表去話畀人聽自己係一個有用嘅人呢？重使唔使成間房用嚟擺衫擺鞋呢？我覺得好折墮，今次新年，我過得真係好有意義，我終於知道自己做緊乜。」
另一方面，昨晚九龍灣國際展貿中心舉行「英皇慈善基金攜手送暖到南亞」賑災活動，出席藝人包括謝霆鋒、容祖兒、王傑、黃耀明、Twins、Boy'Z、鄭希怡、EricKwok、吳浩康、梁洛施及李逸朗等等，大會方面公布英皇慈善基金共籌得四百一十二萬，捐給香港紅十字會，昨晚紅十字會派出秘書接受英皇所捐增的支票。
該筆善款包括昨晚的入場門券收益一百萬、徐小鳳捐出十萬、英皇娛樂旗下十多名藝人共捐出六十三萬五千，以及楊受成以個人名義捐出的六十三萬五千元等。
千嬅望親赴災區
所有英皇歌手開場時齊集台上合唱《WeAreTheWorld》，接着容祖兒打頭陣獻唱，她說：「生命好脆弱，大家要珍惜眼前嘅嘢，應該盡力幫助每一個人，我睇報紙好多機構籌款，短短幾日香港籌到二億幾好值得驕傲。」說完祖兒獻唱《我的驕傲》，而現場亦播放了徐小鳳的錄音，徐小鳳說：「呢幾日睇新聞，感覺係不可相信，相信災難發生後有好多後遺症，𠵱家應該發揮香港人嘅精神，踴躍捐輸。」中段眾星大合唱《明天會更好》。
此外，楊千嬅和莫文蔚（Karen）昨日在九龍灣出席「童聲同心同賑義賣」活動，向現場圍觀者呼籲賑災，千嬅率先捐出五百元，她更希望可以到災區探訪，更會聯絡曾志偉查詢救災情況。
