南亞世紀海嘯大災難，受到全球關注，美國方面有樂隊LinkinPark發起籌款，而喺英國方面，最近就發起一個類似BandAid嘅慈善合唱組合OneWorldProject，為海嘯災民灌錄新歌出碟籌款，參與嘅歌手包括金童子奇里夫李察（CliffRichard）、佐治童子（BoyGeorge）以及奧利花紐頓莊（OliviaNewton-John）等。
呢隻為南亞世紀海嘯大災難籌款嘅細碟，係由英國唱片騎師MikeRead創作，佢喺災難發生之前已經作咗呢首歌，最初覺得首歌太傷感，諗住唔會公開，但當佢喺電視見到災難中四出找尋父母嘅小朋友後，阿Mike就諗到要將呢首歌推出嚟籌款。
現時金童子奇里夫李察同佐治童子，已分別喺巴貝多同紐約為首歌錄音，而喺瑞士度假嘅前Boyzone成員RonanKeating，亦準備喺附近嘅Studio錄音。已經答應合唱嘅重有BeeGees嘅RobinGibb、BarryGibb同ONJ奧利花紐頓莊等。不過，阿Mike表示因為首歌太憂傷，唔適合好似BandAid首《DoTheyKnowIt'sChristmas？》咁有好多人大合唱，所以首歌最多由十位歌手演繹，而佢嘅目標係為海嘯災民籌超過二百萬英鎊（約三千萬港元）嘅善款。