最近有個回復單身嘅公子，成為各大娛樂版同雜誌嘅常客，見親佢都係一時追咗呢個，一時又追咗嗰個，身邊嘅女仔三五日就換畫，成個花花公子咁。
啲女仔以為呢個公子家底唔錯，而且個樣又生得幾好，自不然好似飛蛾撲火，唔知死咁撲埋去。但其實個公子根本就係失匙夾萬，只係揸住架靚車四圍招搖，個袋就仙都唔仙吓。
公子不事生產，有乜事都係攤大手板問老竇攞，但佢老竇對呢個仔都死咗一半心，對佢胡亂揮霍亦好鬼不滿，所以已經閂咗水喉，公子嘅銀行戶口𠵱家已經乾塘，惟有乜都碌住卡先，佢𠵱家欠銀行二十幾萬卡數，重諗住叫佢老竇幫佢找數。
馮仁昭如果係公子嘅老竇，一定唔會幫佢，等佢反省吓自己嘅行為先，亦要提醒吓啲妹妹仔，唔好見人哋身光頸靚就以為有着數黐埋去。
吳浩康上年因藏毒搞到周身蟻，估唔到都俾佢攞到「四台聯頒卓越表現銀獎」，前晚佢重變得好坦白，喺後台面對大班記者話：「半年前一個夜晚同樣有咁多記者，我以為冇晒朋友冇埋唱片合約，點知有公司同電台肯畀機會我。05年我嘅大目標係要戒咗講大話嘅壞習慣，講大話講得好攰㗎，每次講都好傷人心。」
鄭嘉穎、楊怡同埋林峯噚日出發去新加坡拍劇集《YummyYummy》，因為要逗留三個禮拜，所以佢哋返唔到嚟做周五演藝界嘅賑災騷。楊怡話自己好冇心肝，雖然成日都想捐錢，但係一起身就唔記得，佢話去完新加坡返港後會提醒自己捐錢，重會叫fans一齊捐。
張國強早前拍咗部電影《情陷擂台》，雖然佢經常做運動，但係同佢做對手戲嘅元彪就因為使出真功夫，所以兩人都打到入肉，每一下都痛至入骨。拍攝完畢後，張國強就去咗醫院醫治，重發現脊骨移位，𠵱家佢就喺香港養傷。
鍾鎮濤（阿B）噚日喺台灣同李行導演一齊出席電影座談會，阿B自封台灣女婿，佢話以往喺台灣拍片五年，最難忘台灣牛肉麵同小菜，佢今次重特登帶埋個仔去台灣食嘢。阿B又諗起當年同林鳳嬌拍戲，嗰陣唔知對方同成龍拍拖，直至一次林鳳嬌要拍一場跌倒嘅戲份，片場嚟咗成家班嘅人幫佢安裝護膝等裝備，阿B先恍然大悟。
田亮噚日啓程到馬來西亞拍攝佢首本寫真集，主題將會盡顯田亮嘅青春氣色，陽光、海灘就當然唔少得，但係當地啱啱發生完海嘯慘劇，身為國寶級嘅田亮今次咁冒險，佢自己都話有啲擔心，田亮話：「因為整個行程早就確定，所以還是要去，自己只好小心一點，應該沒甚麼問題。」
萬綺雯同鄭浩南噚日喺台灣為劇集《我和殭屍有個約會3》宣傳，萬綺雯少有地着咗一件極性感嘅粉紅色露肩裙亮相，身材玲瓏浮凸，萬綺雯話拍戲時受咗唔少皮肉之苦，好似喺北京拍外景嗰陣就因為吊威也吊到斷肋骨，又搞到脊椎受傷，唔笑得又唔跳得，好鬼慘喎。
