倫敦之旅勝在冇目的、冇嘢做，所以有好多時間睇書，食早餐時睇、搭地鐵搭巴士搭船搭飛機時又睇。呢排睇書點能夠冇《達文西密碼》份，個人對達文西好有感情，因為曾在電影中創造過達文西呢個角色（羅家英飾演），所以感覺上好似同文西好老友。
《達文西密碼》一書在手，第一感覺係好重同埋好厚。啲字又細隻又密麻麻，有排拮。作者DanBrown經已發咗大達，左右腳輪流敲跛都唔使憂，真羨慕識寫英文的作者，一紙風行，幾代受惠。
未觀其人，先讀其書，阿Dan應該係一位非常「譖」氣又長氣嘅人，可能由於阿Dan做了超大量的資料搜集，又唔捨得揀一啲嚟刪走，所以個故事發展得好慢，一晚嘅事講咗成年咁長。《達文西密碼》以達文西遺下的許多個謎作根據，然後作者半真半假地編寫故事，都幾似層層，不過相去《鹿鼎記》甚遠，當日睇完《鹿鼎記》，信十足世上曾有過韋小寶此人，記得當年考會考，問題問誰人代表中國簽署尼布楚條約，我好似答咗韋小寶。
《達文西密碼》將會拍成電影，荷里活展開男主角爭奪戰，最終好似由湯漢斯奪得飾演蘭登的殊榮。其實蘭登在書中無甚作為，雞手鴨腳，除咗識答幾條問題同埋俾人扑穿頭之外，全程行行企企，食飯兩味；真正的主角是羅浮宮館長及其孫女，當然還有達文西。熱切希望荷里活有關人士會考慮由羅家英飾演達文西，咁就真係好睇。