天文台話氣溫回升，但八方仍覺天寒地凍，想食啲熱嘢，但由火炭到沙田大圍到九龍塘，都諗唔到有乜好食，結果驅車去咗九龍城，幫襯「大婆牛肉麵」，竟然遇到李純恩，聽咗一個旅遊界，特別周梁淑怡應該聽嘅故事。
李純恩話最近忙於拍電視，唔係本港劇集，而係幫上海電視台個「生活時尚頻道」拍十三輯《自由流行在香港》。佢同張婕做主持，首輯在上月二十六號晚上七點播，介紹尖沙嘴；第二輯會介紹銅鑼灣。呢個頻道，覆蓋一億觀眾。
八方問佢點解拍呢輯節目？答案係有次佢有班上海同學來港旅遊，結果日日去紅磡買嘢，住又住到天水圍。最後一日，個導遊在車上問：「香港好不好玩？」「不好！」再問「你們會再來嗎？」「不來！」李純恩個舊同學重問佢可以喺個咁嘅「地方」住二十幾年！激到佢要去拍電視介紹香港真正好去處。旅遊發展局係咪應該諗諗呢？
傳真︰2623-9278
電郵︰