今年元旦可謂悲多過喜，八方身邊好多朋友睇到南亞海嘯天災，都冇心機再去倒數，新年願望都由以往升職加薪，變成一家人平平安安、齊齊整整就算，至於剛剛俾壽爺訓斥嘅董團夥，壽爺叫佢哋查找不足，團結一致，於是個個新年願望都同中央要求睇齊，咪話唔聽教聽話！
好似因為鍾麗幗事件俾外界片到七彩嘅公務員事務局局長王永平，佢新年願望就希望廣大市民生活持續見改善，而政府就可以同公務員隊伍，攜手努力解決問題。不過，廣大市民第一個願望，就係查清楚鍾麗幗有冇向大地產商輸送利益，王永平局長唔知又收唔收到呢？
至於一直冇乜人識嘅工商及科技局局長曾俊華，佢同經濟發展及勞工局局長葉澍堃都祝願經濟持續復甦、百業興旺，市民心境祥和、事事順意，打工仔升職加薪，佢哋願望實唔實現到，就睇佢兩個今年搞香港經濟搞成點。
局長「新丁」，衞生福利及食物局局長周一嶽就希望香港人人健康、敬老扶幼，港人團結融和、共建明天；「阿瑟王」教育統籌局局長李國章都係想新一年人人團結，和諧共處，不過若果特區再係咁貧富懸殊，怕且佢哋都係希望落空。
而因為紅灣半島同領匯事件搞到一頭煙嘅房屋及規劃地政局局長孫明揚，就希望樓市更趨穩定，房地產持續健康發展，不過點解佢願望入面冇今年「領匯」可以生生性性上到市，又或者保佑終審法院咪判盧少蘭勝訴？
傳真︰2623-9278
電郵︰