新年伊始，好難忘記地震海嘯帶來嘅巨大災難，幾萬個死者之中，有一位貴族，就係泰皇嘅男孫。一位曼谷老友喺電話講起：「我哋唔想提、唔敢提，皇上只得一位男孫，寄以厚望，你知啦，我哋皇太子，唉……」左丁山明白佢講乜，泰皇已經七十幾歲，愛民若子，備受尊崇，但皇位傳男不傳女。
唔講啲衰嘢，諗吓今年點樣搵錢又如何？人人都話中國興起，注重中國市場，投資着重中國，睇嚟國企仍受注目，民企之中，或有藏寶，值得細心研究。不過投資民企，風險甚高，主要就係人的風險，即使民企生意好好，但創維事件記憶猶新，民企嘅創辦人、掌舵人分分鐘自製麻煩，嚇死投資者。
上網睇到，北京大學光華經濟管理學院在○四年十二月二十二日第三十一次學術午餐會發表一啲企業資料。九二年開始，中國一千二百間上市公司中，有二百家發生醜聞，比例係六分一，問你驚唔驚？過去一個月出事嘅，就有創維、健力寶、伊利三家知名企業嘅負責人出事！
民企出事率點解咁高呢？中國知名教授溫元凱調查分析中國六百七十四個億萬富豪，發現農民出身嘅富豪最多，大半冇讀過大學，即係靠打拼出來嘅。呢點唔稀奇，香港白手興家嘅大富豪之中，大學畢業生絕少，讀得書多嘅人好難發達嘅。蓋茨都費事讀完哈佛啦。溫元凱指出中國大富豪有四大頑癥：（一）狂妄；（二）貪婪、野心大；（三）好色好賭；（四）感情所累。呢四大頑癥講得好啱噃，左丁山見過一啲新發財，大多數如此，不可一世，好玩明星，唔賭錢就係賭大生意，盡地一煲。民企就係因為咁，可以狂升，可以大跌。