馮仁昭四圍超：
章子怡、霍啟山日租$6500酒店迎05

章子怡近排雖然忙緊喺美國拍攝由史提芬史匹堡（StevenSpielberg）監製嘅西片《藝伎回憶錄》，但呢幾日係當地嘅假期，所以章子怡趁放假即刻千里迢迢飛嚟香港，喺數碼港嘅五星級酒店，同男友霍啟山共度聖誕同除夕佳節。

混入人海迎新年
章子怡同霍啟山自從喺舊年四月在港舉行嘅LV派對中一舞傾情之後，兩人火速撻着，愛得極度癡纏，之後重有周刊拍到佢兩個喺中環蒲完吧，喺停車場啜爆嘅親熱鏡頭。喺新一年咁重要嘅日子，呢對小情人難耐相思之苦，上周四就一齊秘密入住位於數碼港嘅艾美酒店、盛惠六千五百蚊日租嘅豪華套房，重有周刊影到章子怡同霍啟山喺大前晚九點幾同坐平治外出嘅照片㖭。
馮仁昭聽聞章子怡同霍啟山大前晚去咗中環「趁墟」，混入人叢中迎新年，大班記者即刻去到章子怡下榻嘅酒店等，但到噚晚都未見佢出現，唔知係章子怡聞風先遁，抑或係霍啟山喺最凍嘅元旦日，因為拖章子怡拖到暖笠笠而唔捨得放手呢？

左慧琪搵欖球迷捐錢
左慧琪噚日以籌款大使身份，去香港足球會舉行嘅青少年欖球賽度，幫海嘯災民向球迷籌款，佢話佢嘅潛水教練身處布吉，不過發生海嘯慘劇後佢已經同教練聯絡咗，知道佢平安無事，但左慧琪見到慘劇覺得好傷痛，佢希望呢啲災難可以快啲過去。

孔慶翔義賣影碟賑災
孔慶翔前晚喺大埔出席倒數活動，現場除咗義賣佢嘅電影《我阿媽發仔瘟》嘅MV之外，大家重齊齊為海嘯災民默哀一分鐘㖭。當孔慶翔唱自己嗰隻首本名曲《SheBangs》時，全場fans即刻起哄，而孔慶翔話早幾個月出第二張唱片，都賣咗成十萬張。

at17寫心意卡祝福災民
官恩娜、at17以及劉浩龍等人前晚到黃金海岸出席「幸福水晶跨年倒數大派對」，幾位歌手同現場觀眾倒數迎接新一年之後，佢哋重以幸運水晶為所有人祝願。
另外，at17同官恩娜亦都率領觀眾寫心意卡，然後轉交畀世界宣明會，希望藉此為受海嘯影響嘅災民送上祝福。

蒙嘉慧寒冬開工歎熱飲
蒙嘉慧同陳豪噚日到將軍澳電視廣播城拍攝劇集《胭脂水粉》，咁啱噚日係香港四十三年嚟最凍嘅元旦日，幸好佢同陳豪嘅戲服都係溫暖冬衣，所以兩個唔使捱凍。蒙嘉慧喺開工前亦十分細心，自掏腰包請工作人員飲下午茶。