二○○五年一月二日，大家新年快樂。呢排睇緊乜戲？相信係《功夫》，呢排講緊乜嘢話題，相信重係《功夫》。所以我今日寫稿都係講《功夫》。
《功夫》在萬眾期待的形勢下公映，寫稿的時候上映了六天，票房收入三千三百二十八萬。嘩！好得人驚呀！相信已經係一個紀錄，但係我相信更加得人驚嘅係《功夫》會不斷創造紀錄，以現在的走勢來看，我覺得上映日期可以一直到農曆新年前，票房數字一定可以突破港產片紀錄。原因係乜？作為一個電影工作者應該分析吸取別人的成功經驗。
當然最大原因一定係周星馳三個字，但係呢個因素對大部份電影人嚟講係冇意義，周星馳唔會乜戲都拍，產量亦都好少，如果香港電影圈係要等周星馳打救嘅，就要等幾年佢至可以救大家一次。我哋亦都唔可以兼冇可能製造另一個周星馳出嚟，因為佢就係嗰個好獨特嘅演員，無論佢處理台詞，形體動作，對演出，對電影嘅睇法都係好獨特。
係咪因為功夫片呢？我哋係有過二十年嘅動作電影黃金歲月，但係近年因為創意缺乏，再加上大量濫拍，令市場上無人問津。
有行內人話：「你畀咁多錢我拍，我部戲都收得啦。」真係天大笑話，過去一年幾多大製作仆直，咁如果計多錢拍就收得，荷里活啲戲咪應該部部收過億。
我覺得個答案好簡單，係認真，《功夫》係一部好認真嘅戲，周星馳近年嘅電影全部都係好認真嘅作品。喺執行上絕對唔係一件簡單嘅事，星仔能夠做到真係好佩服。