蓮莎時代廣場迎05唱走哀傷

雖然二○○四年年尾發生咗印尼九級大地震引發滔天海嘯嘅大災難，至今已經有十幾萬人死亡，受災嘅國家遍及南亞、東南亞同東非等十幾個國家，但噚日二○○五年元旦始終係值得慶祝嘅日子，所以喺前晚大除夕，美國紐約市民都聚集晒喺著名嘅時代廣場一齊倒數迎接新年。

落力表演
而喺剛過去一年喺美國上位最快、新聞性十足嘅少女新星蓮莎露夏恩（LindsayLohan），前晚就為一年一度喺時代廣場舉行嘅倒數活動擔任表演嘉賓。香港近呢幾日嘅天氣突然轉冷，搞到除夕出街倒數嘅市民都好似少咗，但係今年紐約就相反，天氣暖咗好多，參加倒數嘅市民自然都多咗好多，蓮莎見到現場反應咁熱烈，表演當然特別落力啦。
十八歲嘅蓮莎前晚以一身白色打扮現身，為聚集喺時代廣場數以十萬計嘅市民獻唱，其間蓮莎唱出早前推出嘅處女大碟《Speak》入面嘅歌曲《Rumors》，載歌載舞時重露出小蠻腰，令台前觀眾嘅情緒更加高漲。

不敢咪嘴
○三年憑主演賣座電影《衰鬼媽咪》而人氣急升嘅蓮莎，上年可謂是非不斷，早排佢先至被人揭發喺現場節目咪嘴唱歌，不過相信前晚喺咁多人面前，照計佢都唔敢再咪嘴啩。