改裝車：<br>換日本WALD新裝Fairlady加辣變型

改裝車：
換日本WALD新裝Fairlady加辣變型

㗎仔改車技術當然超卓，但係喺香港，頂晒籠都只可訂改裝補品由香港車房安裝。想由補品到安裝都係日本製造，除非你肯花大筆錢Send架車返日本，否則絕對無可能。不過冇可能只係以前嘅事，𠵱家就有車行剛啱攞咗日本改車名牌WALD嘅香港代理權，可以幫各車迷勁改，將部車加辣變「型」先運嚟香港。好似今日介紹呢架開篷版Fairlady，換上一身日本新裝，外形變得超獨特之餘，計落條數重平過買咗車先喺香港改㖭！

記者、攝影：馬慶武
Model：Salina（StarAsia）

四十幾萬車價連改裝

呢架日產嘅雙門雙座開篷跑車FairladyZRoadster，包括全身型格包圍、鬼面罩、19吋電鍍合金軨、排氣喉、甚至係內櫳嘅真皮桶椅都係日本WALD出品，而且更加係由日本WALD廠方親自進行改裝，無論手工、安全性及融合性都更有保證。本身喺香港已極少見嘅FairladyZRoadster，經過改裝後外形更係獨特地辣、突出地「型」，加上全身全新改裝都係真正日本製造，四十餘萬嘅車價連全車改裝費，真係算抵喎！

20秒開蓬過程
■整個電動開蓬過程唔使20秒，無論好天或落雨，變身一樣可以好快手。

限量胎軨橙黑Seat最搶眼

開篷Fairlady本身已擁有一副公子哥兒Feel嘅跑車格局，所以換上大包圍及19吋合金軨絕不突兀，感覺非常合襯。鬼面罩同包圍造型唔算跨張，反而最搶眼嘅係四輪電鍍拋光嘅19吋合金軨，據WALD嘅代理講呢款5幅式嘅WALD合金軨係限量版本，更已經停產，係好矜貴嗰隻。經改裝後，呢位一身「黑衫」嘅Fairlady冷艷中帶點火辣，黑色勁裝內裏更係誘人，一雙橙撞黑嘅真皮桶椅上繡着WALD橙字，配合同色調嘅軚環與本身駕駛席、中控台頂分別兩組三圓表板及加減波棍，令車廂充滿跑味外，重夠晒搶眼。想型盡公路，搶盡收視，真係凍一凍都要開篷，享受頭髮被風吹起嘅感覺呀！

WALD改裝補品
■四輪19吋合金軨同Fairlady嘅跑車格局好合襯，經過電鍍拋光嘅閃令外觀，更係全車身最為搶眼嘅改裝。

■車頭擾流有辣味卻唔誇張，鬼面罩改動較顯眼，同原裝部件分別最大。

■換上WALD雙出式排氣喉，排氣聲超雄厚，離遠已經可以聽到殺氣騰騰嘅轟轟聲。

■橙撞黑嘅三幅式真皮軚環加埋中間大大個Z字，有點科幻感覺。

■一雙橙黑皮Seat係車廂裏頭最搶眼嘅改裝，亦令呢部Fairlady開蓬之後更加有型。

偈力猛喉聲勁

今次改裝只着重外表，引擎、避震等完全冇掂過，只係將雙出式排氣喉換為WALD出品，一踩油已可聽見雄渾嘅排氣聲。一台V6引擎擁有280匹最大馬力輸出，動力強橫，絕對唔會失禮排氣喉強猛嘅咆吼聲，再用埋反應靈敏又易用嘅加減波，無論喺多彎山路或者極速公路上馳騁都一樣過癮。

其他裝備
■死火燈制、煙灰盒設於手制旁，打死火燈更就手。

■真皮內櫳原來係用嚟襯表板嘅橙光。而除咗刻度之外，連液晶體顯示嘅低光都係橙色，型！

■中控台上方亦有三個圓表，最右手邊係液晶速度顯示表，極有賽車Feel。

■冷氣旋鈕、音響上方留有空間，可以安裝DVD等影音設備，提升駕駛享受。

■五前速加減波箱反應夠快又易操控，令Fairlady嘅玩樂味道更強。

■乘客位設有專用彈出式杯架。

■開蓬車難得有咁大嘅尾箱空間，實用性大增。

■一雙頭燈未經改裝，但一體式燈組型態已非常冷酷。

■尾冚上設有較高置嘅煞車LED燈，增加黑夜行車嘅安全性。

NissanFairladyZRoadster（WALDVersion）Specifications

引擎：3498ccV6DOHC
馬力：280ps/6200rpm
扭力：37.0kgm/4800rpm
傳動：5前速自動+/-波
懸掛：（前）多連桿（後）多連桿
制動：（前）通風碟（後）碟式
輪胎：（前）245/35R19（後）275/30R19
尺碼：4310×1815×1325mm
軸距：2650mm
車重：1550kg
車輛提供：WALD(H.K.)（28388410）www.wald.com.hk

新車售價：約$40餘萬

■車尾包圍線條唔太高調，造型較為流線、圓渾。