東方有色（230）同系東方鑫源（1208）上周五（31日）公布獲注鋁業，成系辣起個勢，東方有色有得諗。
老老實實，東方有色現價貼近每股資產值0.69元，炒資產折讓，無乜幾多水位。但要咁睇，東方有色阿媽「香港五礦」，對上阿公「中國五礦」，係全國最大銅鐵、有色金屬及礦產進出口集團，喺國內持有160家獨資或合資企業，後台夠照，東方有色可以變得好超凡。
有色系喺本港得兩隻股，有關照，唔係東方鑫源，就係東方有色。呢期東方鑫源行快一步，憧憬東方有色係下一隻。再講，同系東方鑫源，上周五公布注資前，市值都講緊18億元；東方有色最新市值得5.1億元，晒士太細，有任何舉動前，一定谷到肥肥白白，股價上番1年高位0.96元（升幅43%），市值亦不過7.4億元。
華置（127）旗下廣生行（189），將於下星期三（1月5日）表決私有化方案，無論結果係點，要收集華置。
又講兩點，華置及廣生行持有灣仔太原街項目，第一期總樓面面積51萬平方呎，早喺03年8月，踏出沙士期無耐，入市補地價，成本1.68億元或每平方呎329元，家陣市道，就算未推住宅，肯定先大賺地價。呢個項目，廣生行揸25%，華置揸得重多，達75%。所以，橫計掂計，華置仍然係最大受惠者。
第二，華置喺銅鑼灣海皮，揸住好多優質收租物業，同區地膽恒隆系，股價晨早超出每股資產值水平，華置現價重有資產折讓23%。呢個禮拜，睇住50日線5蚊做人，到價收集，博上NAV6.8元，潛在回報36%。
錢雋