一講到暴力美學，好多人都會奉昆汀塔倫天奴為神明！如果你都係《危險人物》及《標殺令》等電影嘅超級擁躉，咁你今個星期真係不得不留意韓國導演朴贊郁嘅《原罪犯》！就連昆氏喺康城首映都點名推崇此片，兼取得康城評審團大獎；故事血腥荒誕，影像爆炸凌厲，不過提提大家，此片乃屬三級，而且畫面暴力非常，開機前要有心理準備。
記者：朱崇德
朴贊郁可算得上韓國當紅名導演，香港人第一部認識他的電影，可以由2000年勁收嘅《JSA安全地帶》說起，其後02年嘅《復仇》，雖然筆走偏鋒、拍攝手法另類，不過從復仇這個點子出發，已可見他的暴力美學根性；到04年香港上畫的《原罪犯》，這是他「復仇」三部曲的第二部（第三部曲正籌劃中），而且電影亦在表現「美」之餘，故事及影像語言已對「通俗性」作點妥協，在艱澀中，只要用點心看，都可算能明。
無厘頭15年大禁錮
故事講述吳大秀（崔岷植飾）喺電話亭俾人綁架，無厘頭一囚就是15年，而且重屈佢係殺妻兇手，其間佢試過逃走、自殺兼自練武功，決心要復仇；正當觀眾們考究佢為何被囚之際，故事筆鋒一轉，擄人者突然將他釋放，而且重提供種種線索，好等吳追查真相；在追追逐逐的過程中，吳邂逅了靚女大廚美道（姜蕙姃飾），吳將其被囚一事告訴美道，美道主動提出要幫他一把，而且兩人火速成為戀人；幾經艱辛，終於查出原因，不過結局原來係另一個精心的布局。
歇斯底里之暴力
睇《原》一片，第一個感覺是故事功力非常高，觀者可以話完全被他帶住走；一捉一放，毫無徵兆，你想「捉」時，他已帶出另一問題──點解「放」？呢種跳格式問題重重叠叠式發生，真係有種吸住人睇嘅感覺。畫面表達亦好富震撼性，好似窄巷困獸鬥，以一鐵鎚力敵數十地踎、鐵鎚脫牙迫供法、生吞活八爪魚等，畫面極盡暴力刺激，又有點電影美學的觀感，都幾有昆汀塔倫天奴的影子！電影中不得不讚崔岷植的演出，佢嗰種開頭戇直，到後期的歇斯底里的暴力，令電影更富真實感。最後是故事結局，可謂扭盡六壬，將電影中零零碎碎的前因，交織出一個意想之外的結局；可以透露的是此片中冇人是最終贏家，並帶出怨怨相報何時了的寓意，大家值得反省。
必睇Bonus爆笑版原罪犯
Bonus都係大路嘅拍攝花絮，冇乜新意，好似講吓囚室搭建工程有幾大，演員在鏡頭後的搞鬼笑料等；但不得不睇是生食八爪魚一幕，原來崔岷植鏡頭前咁英勇，鏡頭後食到反晒胃又嘔，極度爆笑。另外窄巷困獸鬥一幕，Making都非常精采，絕對要一睇！
價錢：$78
區碼：3區
發行：安樂
DVDPRO
電話：23326326
地址：旺角奶路臣街6E德發商場地庫B4舖
