元旦日遠足，到西貢萬宜水庫附近的破邊洲應應節，破邊洲上有懸吊半空的貴妃池，對池許願望新一年心想事成。不過事先聲明，登破邊洲須乘駁艇搶灘兼寒風凜冽，許願，也要付出代價。
記者：方英男 攝影：林栢鈞
模特兒：Leon（M3ProductionLtd.）、Katie
鳴謝：友晟之友
搶灘登陸破邊洲
要欣賞破邊洲好易，由萬宜水庫東壩紀念碑行15分鐘山路上花山，就可以遠距離俯瞰破邊洲風采，但若要親身登陸，則須坐駁艇搶灘，今日的領隊梁Sir說：「由於風高浪急，加上搶灘上岸有一定危險，自問有番咁上下遠足經驗同身手先好去呀。」咁辛苦上到去，眾人即時對住貴妃池許願，Leon問：「Katie許乜願呀，想樣靚身材正？」Katie不答：「關你乜事？係呢？呢度點解叫貴妃池嘅？」梁Sir解釋：「論形狀，破邊洲貴妃池同北京正宗貴妃池（即華清池）差唔多，所以本地旅行界咪幫佢起咗呢個名堂囉。」許完願，再欣賞四周的有數十億年歷史的玄武岩石壁，這些石壁又稱流紋岩，由岩漿和火山碎屑冷卻而成，呈柱狀的石條最少高百呎，真箇鬼斧神工！
花山巧遇羅漢松
看罷貴妃池，再次乘駁艇搶攤，在梁Sir帶領下，我們在破邊洲北近東圍堰附近的花山山腳底登岸，沿崎嶇山路行20分鐘，終於到達花山高崗，高點俯瞰破邊洲，氣勢果然雄偉，眾人邊觀景邊大喊：「嘩！好大風呀，小心吹落山！」風大不足以吹人落山，但卻冷得人口水鼻涕直流。繞過高崗，沿山路前行，偶遇一棵羅漢松，羅漢松在大陸有價有市，大陸常有不法之徒乘快艇至此砍伐偷運回大陸，花山山崗上的羅漢松已幾近砍伐殆盡，這棵死剩種，我們要好好保護，別肆意破壞。
斧劈崖臨海矗立
眾人向白腊灣方向前進，20分鐘可遙望白腊仔的木棉洞，須臾，另一景點出現，梁Sir遙指遠方臨海的「斧劈崖」說：「點解有呢個名堂，因為幅崖壁似俾斧頭劈出嚟咁囉，石質都係玄武石。」續前行過白腊仔，經過一個層次分明的小石灘，石灘雖小，但奇在由近水處數上岸有明顯七層碎石，梁Sir笑道：「過癮呢？旅行界幫佢起咗個朵，叫『七層石灘』，佢係香港埋得石頭、石頭堆得最多嘅石灘，畀心機數，可以數到七層！」
東丫魚排留影
上完山下海，續行20分鐘來到冷門海浴場白腊灣，此灣位置偏僻，刻下嚴冬更是乏人問津；山路接村路，步往白腊灣度假村，現非宿營旺季，度假村極冷清，不過梁Sir說：「呢度係遊花山中途補給站，夏天人多到你唔信，好多遠足發燒友行到肚仔餓兼口渴，都會喺度假村買支水、食個餐蛋麵。」
過白腊灣，向東行，沿石屎山路到東丫天后古廟，途中經過一遭山火洗禮的焦黑山頭，但放眼一片黑，光禿禿的已夠觸目驚心，所以一拐入建於乾隆六年（1741年）的天后古廟，Katie即第一時間參拜，Leon八卦，問：「又求啲乜呀？」「希望以後都唔會有山火囉！」美少女果然心地好！
去程：西貢市碼頭包艇前往破邊洲搶灘，視乎人數全日約$500至$800，船家李先生電話：96774016。
回程：東丫依麥理浩徑出西貢萬宜路，乘的士（約$70）返回西貢市中心（西貢的士台：27291199），或事先相約船家在北丫上岸回西貢碼頭。
醫肚站
行足6小時，天寒地凍肚仔餓，即時回西貢市中心歎番碗車仔麵暖肚，價錢$15至$20。
松記車仔麵（27929172）
地址：西貢巴士總站福民路高勝樓19-21號地下
