今日係二○○五年元旦日，亦都係英女皇一年一度公布元旦授勳名單嘅日子，今年有幸獲英女皇頒授勳銜嘅香港人有五位，其中現任警隊嘅高級助理警務處長杜偉義獲以前事頭婆頒授俗稱「OBE」嘅英帝國官佐勳章，以表揚佢喺香港回歸後，出任警隊最高職級嘅外籍警官，為一眾𠵱家重喺警隊入面工作嘅外籍同袍帶來鼓舞，八方即刻諗住恭喜杜sir，但杜sir透過警察公共關係科話想低調，唔想發表任何回應，八方諗咁都啱嘅，話晒𠵱家杜sir服侍嘅主子已經唔係英女皇，喺新嘅主子面前點可以咁高調多謝前主子。今次除咗杜sir外，已退休嘅英基沙田小學創校校長GordonLewis亦都獲頒OBE，而英國文化協會行政經理陳陳芬芬女士、英國駐港總領事館護照部經理劉玉景女士，同埋長期服務香港退伍軍人嘅退休少將羅旺賢亦都獲頒俗稱「MBE」嘅英帝國員佐勳章。
（圖）高級助理警務處長杜偉義獲頒「OBE」勳章。
傳真︰2623-9278
電郵︰