四大樂壇頒獎禮陸續派發成績表，大熱新人王梁洛施（Isabella）表示感到巨大壓力，令她變得脾氣暴躁，幸獲母親炮製愛心湯水下火。對於有傳她與勁敵薛凱琪不和，Isabella坦言與對方並無聯絡。
梁洛施是今年樂壇頒獎禮女新人獎大熱門之一，日前她在《新城勁爆頒獎禮》中更率先奪得「勁爆新人王」獎項，雖然她表示會以平常心面對得失，但始終感到壓力。日前Isabella在尖沙嘴接受訪問時說：「壓力就梗係大啦，呢排個人都暴躁、易𤷪𤺧咗，一時瘋狂食嘢，一時又唔食，有時返到屋企見到媽咪又唔講嘢。」
幸好Isabella的母親亦明白愛女年紀尚輕，面對事業上的壓力時會感到吃不消，故特別炮製愛心湯水給女兒下火。Isabella說：「媽咪有煲湯畀我飲，好似蘿蔔雞湯，佢知我成日開工都唔夠瞓吖嘛。」
Isabella與薛凱琪（Fiona）同為樂壇女新人王熱門人選，早前有報道指Fiona寸Isabella，二人傳出不和。
問Isabella與Fiona交情如何時，她說：「平時冇乜嘢，傾一兩句，我唔覺佢寸，不過我同佢唔係深交，冇聯絡，亦都冇佢電話，我同Ella（官恩娜）好啲，私底下有傾電話，Ella跳舞好好，唱歌又好聽。」
問到Isabella覺得Fiona為人如何？她說：「幾得意，冇乜嘢，幾nice，有禮貌。」
Isabella反而彈自己說：「我以前未出過嚟做過嘢，見識少，講嘢又唔叻，唔識𠱁人歡喜，好多時唔知點做，講嘢叻嘅話，難聽啲係世界女，講得唔好又俾人話蠢，唔夠圓滑，重要慢慢學。」
採訪：朱倬誼 攝影：仇志德
髮型：Roy@ChinG
服裝：SistyrMoon
場地：金滿庭（奧海城）
