新年快樂！回顧剛剛過去的2004，寵物界都轉過唔少潮流。最Hit話題當然是睇到唔少人眼濕濕的《導盲犬小Q》；最矚目新聞就係鸚鵡偷竊案接二連三，令本來已經動輒幾千蚊一隻的鸚鵡成為當頭起，海鮮價天天變。不過無論潮流點變，奉勸各位一句，養寵物係一生一世的承諾，唔愛佢就唔好害佢，買之前請三思！
記者：邵超
部份攝影：蔡鴻雯
In細狗最得寵
05狗界依然是細狗最Hit！皆因香港地豆腐膶咁細，令松鼠狗、西施、北京狗等小型犬種依然力保王者地位。除非你住村屋，先至會買隻大狗看門口。但係先排太多人入貨，令到隨街都係金毛尋回犬、雪橇和史納莎，市場飽和，05必Out！
長青 松鼠狗Pomeranian
原產地：德國博美鎮
臉如Q版狐狸的松鼠狗是家中「開心果」，開朗、活潑、友善的性格，令牠成為家中領袖。毛髮鬆開令外形似個波，步姿勁Cutie。
新貴 約瑟爹利YorkshireTerrier
原產地：英國約克郡
身形小巧美觀，長而豐厚的披毛，好似絲般柔亮，加上聰明、忠心、活潑又溫馴，令約瑟成為玩具犬佳品。
長青 西施ShihTzu
原產地：中國
西施真係無改錯名，長年美名無回落迹象，毛髮留長啲會更端莊高貴。寵物店入咗貨唔怕賣唔出，賣咗又唔覺賺好多嗰隻。
新貴 比熊BichonFrise
原產地：法國?地中海
比熊應該繼張曼玉後獲得巴黎市金紀念章，牠同樣氣質優雅，乃法國原居民移港，有效促進中法兩地文化交流，是巴黎的驕傲。
長青 芝娃娃Chihuahua
原產地：墨西哥
全世界最小型的犬種，似足玩具，性格好動，自我意識頗強，同佢傾偈會好開心（雖然「狗」頭唔搭「人」嘴）。
新貴 玩具貴婦狗ToyPoodle
原產地：德國
日本雜誌曝光率最高的犬種之一，㗎妹勁冧，朱古力色備受熱捧，其豐厚的鬈毛十足一隻TeddyBear，放在玩具熊堆中，真係要花少少時間至認得出。
長青 北京狗Peking
原產地：中國
形態像獅子的北京狗，獨立又勇敢且優美靈巧，唔鍾意吠、性格文靜，是牠長年受歡迎的原因。
新貴 潘布魯克威爾斯哥基犬PembrokeWelshCorgi
原產地：英國威爾斯
近年愈賣愈貴，原因不明，追近一萬蚊仍有價有市。哥基笑容可掬，四隻腳短而結實，對主人忠心、溫馴，天性愛嬉戲。
Out
原因：數量太多，梗有一隻喺左近，貪新鮮的香港人已經停止跟風。
西伯利亞雪橇SiberianHusky
原產地：西伯利亞
史納莎Schnauzer
原產地：德國
貓潮平淡
04年的貓壇無乜受過潮流大衝擊，所以銷情平淡。所以05年，始終以短毛貓為主流，全因香港人懶打理之故，當中摺耳、波斯長居銷量榜首。
蘇格蘭摺耳貓ScottishFold
原產地：蘇格蘭
摺耳其實興咗好耐，都開始OutOut哋！不過香港人對貓比較長情，加上摺耳個性溫馴、平易近人又聰明，穩定性高，較易飼養，立於不敗之地。
異國短毛貓ExoticShorthair
原產地：美國
短毛貓大行其道，都係因為香港人懶打理。不過異短又真係好乖巧伶俐，臉圓圓，眼仔睩睩，身材豐滿，牠的老虎斑紋版正是加菲貓的創作來源。
英國短毛貓BritishShorthair
原產地：英國
英短的臉部和身體圓渾，充滿結實的感覺，樣子格外純真可人，性格就似足英國佬內斂、悠閒，溫馴到人見人愛。
波斯貓Persian
原產地：英國
波斯貓扁面扁鼻哥、全身圓碌碌兼且係長毛，依然豔冠香港貓界，換上係人一定被鬧「豬扒」。
04寵物界潮事
導盲犬小Q衰大隻
拉布拉多LabradorRetriever
原產地：英國
小Q的熱潮起得快，死得重快，竟然無帶挈寵物店發一筆拉布拉多獵犬財。根據各大狗店店主所講，大狗在香港始終客路有限，鬼叫小Q話咁快變「大Q」，唔可以好似卡通人物小獵犬Snoopy咁，永遠身材不變！
加菲貓不嬲紅
異國短毛貓ExoticShorthair
原產地：美國
上班一族寵兒加菲貓，首次電腦動畫化登上大銀幕，寵物店亦立即出現正印加菲真貓版。老實講句，呢款正版異國短毛貓（老虎斑紋色）一向受歡迎，其實都唔太關加菲貓事！
貴價鸚鵡引賊仔
託屋村唔畀養狗之福，鸚鵡行情上漲，成為04寵物竊賊覬覦的目標之一。其中最聰明的鸚鵡非洲灰鸚鵡、當頭起亞馬遜鸚鵡和白葵花鸚鵡最受（賊）人歡迎。
非洲灰鸚鵡AfricanGreyParrot
原產地：非洲
亞馬遜鸚鵡AmazonParrot
原產地：亞馬遜
裏原潮狗貨源少
柴犬ShibaInu
原產地：日本秋田縣
中國唐狗用嚟劏，「日本唐狗」柴犬就係國寶，04年更由日本裏原班潮人帶起熱潮，身價成萬幾蚊港紙，其中黑色的柴犬最貴。柴犬外表純樸可愛，勤力好動又順從主人，機警又勇敢，在港很受歡迎，可惜貨源極少。
