年港股好頭好尾，第一日（1月2日）就大升225.5點，大除夕半日市亦上升66.5點，全年埋單有1654點進帳，成交亦大為轉旺，展望05年好景可持續，謹祝大家揸股皆升，由年頭賺到年尾。
港股舊年可以話「段段有」，首季國企係咁上，年中由藍籌，特別係地產股來接力，到第4季，濠賭概念股更大放光芒，升幅有高達幾十倍者，創造了04年的神話，到噚日大除夕，「濠」股繼續成為熱炒對象，且有多隻創出新高。
「濠」股炒風雖烈，但無論係做賭、做酒店、抑或做旅遊，都係有實際收益，唔似早兩年炒科網股咁空泛，所以「濠」股熱潮重會持續，家吓唔單止行內人睇好，連芬佬亦都睇得好好，紛紛上車。05年揀股，無論係用作投資、抑或係投機，「濠」股依然係首選。
噚日創出新高的熱門「濠」股有新濠（200）、英皇中國（296）、廣益國際（530）同嘉華建材（027）等。以1年計，英皇中國升幅最大，由1.256元（經調整）升到20.5元，升幅15.5倍；新濠由1.96元升到19.70元，上升9倍；嘉建由0.62元升上5.85元，升幅8.4倍。至於廣益，去年底1.8仙，噚日收7.1仙，升2.9倍。
不過，最為人津津樂道都係奧瑪仕（959），以1年計，由0.355元升到噚日收市2.825元，升幅6.9倍。但若以全年的高低位計，今年10月29日，股價重係4.5仙，到12月23日，已去到4.10元，升幅係90倍，夠晒誇張。
邁特科技（1031）高價曾經上過0.6元，之後出現調整，但近日已由低位回升，噚日收0.51元，1年升幅亦係在10大英雄榜內，由去年底的3.6仙升到0.51元，升幅13.1倍。
澳門概念股陸續有來，前日冠中地產（193）突然有異動（跟住停牌），噚日又輪到隻和成國際（651）捲土重來，高收4.3仙，大升34.3%。早輪和成最高曾搶上5.3仙，之後出現調整，形成三角形，噚日破位而上，成交且大增到14.7億股，照度上去，上升目標指向7.5仙。
郭兆誠