最近為紀念粵劇紅伶任劍輝逝世十五周年，有一連串嘅任劍輝主演嘅粵劇電影重新上演，頗收旺場之效。有一套遺失多年嘅《大紅袍》（十奏嚴嵩），唔知點解會俾有心人喺美國搵番，據講係在垃圾桶執番出嚟嘅。但全套戲得番五分三，片長五十五分鐘，幸好主題曲仍在，任劍輝演海瑞，靚次伯做嚴嵩，女角有羅艷卿、李香琴，係當年嘅鋼鐵陣容。任姐戲迷睇唔到全套，唔會不滿，只係睇任劍輝與靚次伯演對手戲，唱主題曲，已經拍爛手掌啦。
大記者鍾意睇番啲任劍輝經典戲寶，為咗睇《十奏嚴嵩》，走去文化中心撲飛，一早滿座，失望而回，後來知道在「電影資料館」之內嘅戲院上映，特登走去西灣河，因為地方比較僻，買飛好容易，但睇戲之晚，氣溫降到十三度，佢又唔知電影資料館隔鄰有停車場，搭地鐵行過去，冷風吹到佢震騰騰。入到戲院，原來冇空氣調節，焗到佢頭暈暈面紅紅，聽講呢間戲院講環保，盡量利用自然風喎。睇完出到街上，冷風吹至，大記者啱啱熱完又碰上冷，當堂領嘢。
大記者對西九龍文娛藝術區應否交由地產商興建，本來揸唔定主意，但睇完《十奏嚴嵩》，有感於康文署搞文化，冇錢冇人冇地，逼人去西灣河睇戲，不禁覺得，假如有西九龍文娛藝術區，將電影資料館搬咗過去，是否會吸引更多人睇香港經典電影？現在將電影資料館屈死喺西灣河，實在可惜到極，邊度會有遊客摸去呀？
左丁山附和佢嘅意見，電影資料館推廣舊電影好落力，好幾次左丁山都想去睇，但一諗到去西灣河，熱情冇晒。香港俗語有云「英雄被困筲箕灣，未知何日到中環」，或可改為「戲寶被困西灣河，未知何日到九龍」！