好多人話韓國知名變性藝人河利秀，正過好多真正嘅女人，最近河利秀出咗隻碟，佢噚日喺台灣上咗電視台錄影節目，大方談論自己嘅整容史，主持人洪曉蕾大讚河利秀靚女，重話如果佢唔做女人就嘥晒，河利秀就透過繙譯大讚洪曉蕾都好靚，身材比例又好，互相吹捧一番。
主持人問河利秀全身上下總共整過幾多個地方？河利秀好爽快咁話喺做變性手術之後，已經陸續整埋個胸同執過個鼻。問河利秀一共使咗幾多錢整容？河利秀就話變性手術用咗千二萬韓圜、胸部使咗七百萬韓圜、整鼻就用咗近三百萬韓圜，總共成二千二百萬韓圜（約十七萬四千港元）。不過河利秀有樣嘢係天然嘅，就係佢滑溜溜嘅皮膚。究竟佢重有冇邊度想整？佢話對現狀都好滿意，暫時唔會再整容。另外，佢重自爆唔鍾意整容嘅男士，尤其係故意整到自己肌肉發達嗰啲。
河利秀又講到用女性用品嘅話題，佢話女士唔單止喺生理期要用衞生巾，有時着好貼身嘅服裝都需要用，佢自己着牛仔褲嘅時候就會墊，以減少身體同褲之間嘅摩擦喎，講到自己真係百分百女人一樣！
王菲同李亞鵬呢對情人關係愈嚟愈親密，喺大前日（二十九號）夜晚九點幾，王菲又同愛郎喺北京東直門嘅一間飯店度撐枱腳，有內地傳媒聞風而至，但飯店保安即刻通水，所以王菲同李亞鵬一出飯店就以九秒九嘅速度上車，再由李亞鵬負責開車送女友離開，認真敏捷。
胡杏兒噚日下午喺將軍澳電視廣播城拍劇，除夕夜慶幸唔使開工，可以同屋企人食飯過年，馮仁昭知道杏兒一個月前先去完泰國蔻立旅行，杏兒亦都為當地發生世紀災難而好唔安樂，佢話：「想像唔到一個咁靚嘅地方會變成廢墟，自己都會捐錢去紅十字會，出一分力幫助有需要嘅災民。」
言承旭（Jerry）喺亞洲各地有好多fans，對於印尼發生大災難，Jerry話佢以前去過嗰度做嘢，有一種情感，所以佢同歌迷會已經發起南亞賑災活動，捐錢去紅十字會。Jerry重呼籲fans要發揮助人之心，佢啲泰國fans就已經組隊去當地六個災區提供救援物資，而菲律賓嘅fans就會舉行籌款晚會。
張崇基同張崇德兩兄弟早排一齊去咗吉隆坡三日，為當地嘅洗腎中心籌款，佢哋話當地有三個洗腎中心，但都唔夠用，所以想幫手籌款起第四間。提到南亞海嘯，張氏兄弟好欷歔咁話：「今次海嘯好有末日嘅感覺，我哋要更加珍惜身邊嘅一切，究竟呢一生係咪過得有意義？」原來佢哋有朋友喺斯里蘭卡遇難，所以好難過。
譚詠麟同李克勤原定噚日喺馬來西亞嘅吉隆坡舉行《左麟右李》演唱會，本來諗住將門票部份收益捐去賑災，好可惜當地決定取消所有娛樂活動。對此，阿麟好無奈咁話：「我哋冇計損失，都明白點解唔舉行，而一月二號嘅演唱會，就未知可唔可以如期舉行，所以我留喺吉隆坡留意消息。」
