一場大災難，令新年充滿傷感，唯一嘅正面消息，就係各黨派暫停互相攻擊，重一齊合作，修補番少少領匯事件對香港社會造成嘅裂痕，亦令大家眼光放番遠，心胸變番廣闊。
民主黨主席李永達死過翻生，自由黨主席田北俊有錢出錢，民建聯雖然冇同自由黨以及民主派一齊搞賑災籌款，但佢哋一早已經籌緊，幾日籌咗近六十萬元，今日佢哋會喺山頂搞千人步行籌款，申請好晒，實行快人一步。成個城市嘅大小機構都一齊起動集資救難，香港空前大團結。
民建聯成員蔡素玉話，佢今次都算執身彩，因為如果唔係佢個姪孫女告唔到假，佢聖誕都會同家人去咗泰國布吉玩。佢話自己上個月去曼谷開聯合國嘅會議，覺得好好玩，於是想同家人去布吉過聖誕，結果梗係去唔成，咪同阿媽轉咗返鄉下福建。
蔡素玉真係一世好命，選舉選到，但係海嘯就遇唔到。雖然民建聯唔同其他黨派一齊玩，但聽到民主派話為籌款不遊行，蔡素玉都猛讚係好事。
八方噚日喺中環睇民主派同自由黨搞捐款，見到梁家傑，梁大狀都有捐錢，佢話啲仔女要應付考試，所以要留喺屋企溫習，睇怕要到暑假先得閒一家大細出外去玩。而佢自己亦好唔得閒，因為要為下周三立法會有關西九龍嘅辯論做好準備，梁大狀話，已經有四個修訂動議，差唔多個個黨派都有提，當中以民建聯張學明嘅修訂同佢嘅原動議出入最大，佢建議撤回單一招標同取消天篷，但係民建聯就改成檢討。
湯家驊就冇出現，原來佢偷得浮生半日閒，同太太去咗日本幾日，返港後又飛咗去上海打高球，噚日剛返港，嚟得及參加元旦各項活動，為賑災籌款。
傳真︰2623-9278
電郵︰