04年尾手提機大戰一觸即發，唔單止兩大代表都賣到斷市，就連互聯網上都經常性地引發對壘式罵戰。踏入05年，一切以和為貴，《爆機狂迷》就搜括咗一堆Game界嘅軟、硬件，以超筍「蘋果價」益讀者，當中包括曾高炒至五千幾蚊嘅PSP，以全港最抵玩價$2,780開賣，重有一堆滄海遺珠嘅正Game，都只係一百幾十就有交易，等大家開開心心過新年！
記者：許福合
攝影：伍慶泉、許福合
ImageGirl：Mandy
齊料版PSP唔使三千
雖然PS2可以話電玩界大哥大，不過講到手提遊戲機，SONY仍然係初哥，PSP推出近一個月，以功能及規格上位，明顯跟傳統手提機唔同，更為着重影音方面嘅功能。最明顯係筆者身邊就有唔少「非機迷」，都有打算買番部過吓癮，可見PSP主打大眾化，初部亦算相當成功。筆者最近採訪過幾間Game舖，除咗熱賣中嘅《GT4》外，最多人買都係PSP，雖然暫時未有行貨推出，不過一眾玩家顯然急不及待，襯住新鮮要立即試玩。而大多數人買PSP多數都指定要買齊料版嘅ValuePack，事關配件比較齊全，有齊專用耳筒、線控、保護套同32MBMSDuo記憶卡。雖然大部份Game舖仍叫價$3,300至$3,500，不過首批PSP由日本製造，勉強算係「較合理」價，想再抵玩啲？揸份《蘋果》幫你慳多$500大洋！
GT4×Nike限量版
《GT4》人氣勢不可擋，同期推出嘅GT4×Nike限量版更屬被瘋狂搶購嘅目標，皆因呢套特別版有Nike波鞋及專屬隱藏Nike概念車，兼且獨有編號及全球限量1,000套，難怪拍賣網上出現標價過萬港元之高！雖然呢個搶錢套裝不設「蘋果價」，不過由於極為罕有，故刊登埋畀讀者參考，等有Buget人士，都知邊度有貨賣。
好玩NDS炒價回落
手提機一向都係任天堂天下，新機NDS亦延續高度遊戲性嘅傳統，雙芒加輕觸屏幕設計，就最令一眾玩家着迷兼叫好。相比於PSP炒價，NDS最厲害都炒上過二千六蚊以上，不過現時NDS價錢與PSP相比可以話平咗一大截，淨機價約$1,380，只係PSP一半左右，不過筆者從遊戲店留意到與PSP相比，購買NDS人數就只算一般，而購買嘅人亦以機迷為主，買機之餘，更會掃貨咁掃幾隻Game返去，可見打機仍然係NDS主要同最吸引之處，理所當然地成為機迷入貨之選。
任記陣營夠抵玩
任天堂呢邊亦唔輸蝕，王牌手提機NDS售價回落，對應嘅遊戲亦好抵玩，今日就精選多幾樣任記嘅招牌作畀大家：
美版《SuperMario64DS》
以當年N64嘅《SuperMario64》改編，好玩之處係充份用盡NDS嘅雙芒優勢，而且更加入不少迷你遊戲及Wi-Fi通訊對戰，絕唔係換湯不換藥，屬買NDS必跟機嘅正Game之一。
市價：$320
蘋果價：$250
《為妳而死》
世嘉擺到明力撐NDS，機迷喺首輪Game之中算係頗為期待，遊戲玩法跟《Touch!MadeInWario》差不多，以攻略一堆迷你遊戲為主，不過畫風及表達方式較為「另類」。
市價：$320
蘋果價：$250
GBASP送對戰線
NDS推出令GBASP直接有降價壓力，由初期千多元，到家陣降至$700度，蘋果價更係$600有找，重送埋保護貼同對戰線，當禮物送畀人都唔「肉赤」！
市價：約$699
蘋果價：$599（送保護貼及對戰線）
買定GC打喪屍
任天堂GameCube嘅遊戲重質不重量，亦無令機迷失望，最近更開始跌價，還未擁有GC機迷就要快手入貨，因為呢個月美版（11日）及日版（27日）嘅《BioHazard4》即將推出，到時GC賣價相信會回升，一眾「生化迷」實應趁低吸納！
市價：$890
蘋果價：$750（兼讀美、日版遊戲）
PS2遊戲大掃貨
無論是否瘋狂機迷，年中總會錯過唔少好玩遊戲，以下幾隻PS2嘅Games不妨趁開年補貨。
《女忍者》高難度正Game
《女忍者》高速在空中飛舞等姿勢都將比前作更加流暢華麗，同時可以飛簷走壁或以殘像趁機攻擊，難度堪稱一等一，世嘉及動作Game追捧者必玩。
市價：$280 蘋果價：$60
《FFX-2》幫女角儲衫
可算係「儲衫版FF」，玩法仍以RPG為主，當中共分有兩個不同部份，其中在主篇故事「國際版」部份跟之前故事大致相同，但遊戲中仍小量修正，有全新戰鬥感受。
市價：$280 蘋果價：$120
《九怨》另類嚇鬼
早一輪驚嚇Game大行其道，繼《SilentHill》、《零》等經典系列之後，有呢隻日式怪談風格嘅《九怨》，全Game充滿鬼聲鬼氣，氣氛營造不俗。
市價：$290 蘋果價：$80
《NeoContra》射擊經典
經典動作射擊遊戲《魂斗羅》嘅最新3D版，不同於以往嘅2D橫向捲軸方式，《NeoContra》改以3D方式進行遊戲，但依舊保留《魂斗羅》一貫嘅爽快感。
市價：$290 蘋果價：$150
《幻想水滸傳4》壯大舞台
遊戲中一共有27個「真之紋章」，但遭到破壞，碎片散布在世界各地，偶然得到「罰之紋章」嘅主角，喺紋章引導下，開始冒險之旅。
市價：$340 蘋果價：$180
售賣點：DreamStore
電話：25753285
地址：灣仔東方188商場256號舖