港股噚日只得半日市，市況較預期熱鬧，成交有成97億元，但mark價活動就唔算活躍。
經紀黃提供05年可以留意的股票，佢叫留意喺大陸做食品及送餐服務嘅福記（1175），由於呢行生意發展潛力大，所以有關人等銳意將佢包裝成一隻基金股，重話未來股價可以繼續睇好。
福記以每股3.10元招股，上月中剛剛掛牌，自上市以來，股價一直硬淨，冇令捧場客失望，剛公布截至今年9月止中期業績，盈利6996萬元人民幣，比去年同期增長超過1倍，反映佢門生意處於增長期，股價於是更上一層樓，噚日升2％，收3.775元，成交金額645萬元。
至於細價股方面，中國銀龍噚日正式改名做中國水務（855），股價即刻大升29.8%，收0.37元，成交金額338萬元。
經紀陳話，呢間公司嘅控股權已變動多時，但好似到最近先至搞掂晒所有嘢，同埋搵到人幫手，所以噚日急升唔似係mark價咁簡單。
慕容小初