滙價窩輪有6件，C與P各半，全部係美元兌3隻外幣──澳元、歐元與日圓。
點炒滙價輪，可以剪存本文。
澳元滙價輪：睇好澳元兌美元，買「澳美C輪3511」，澳元升，隻輪升。5月底到期，輪價30仙，溢價0.8%，槓桿率20.2倍（有效亦係）。睇數據，隻輪博得過。要顧慮嘅係，由去年9月初至去年底，澳元兌美元升幅達13.6%，怕唔怕有回吐？
睇淡澳元兌美元，買「澳美P輪3515」，澳元跌，隻輪升。5月底到期，輪價17.6仙，溢價5.4%，槓桿率34.4倍（有效12.3倍）。隻輪溢價太高，澳元若跌得唔夠勁，會蝕溢價。
歐元滙價輪：睇好歐元兌美元，買「歐美C輪4653」，歐元升，隻輪升。5月底夠鐘，輪價45.5仙，溢價2.6%，槓桿率23.3倍（有效13.4倍），溢價嫌略高。
睇淡歐元兌美元，買「歐美P輪4657」，歐元跌，隻輪升。輪價5.4仙，5月底到期，溢價10.3%，槓桿率196倍（有效23倍）。買唔過理由係溢價好高，買得過理由係博歐元有技術性調整，同埋「仙輪」心理上跌晒都係幾個仙。
日圓滙價輪：睇日圓兌美元會繼續升，買「美日P輪4658」（係P唔係C，因為外滙市場上係「美元兌日圓」，唔同澳元與歐元，係「兌美元」）。5月底到期，輪價29.5仙，溢價3.8%，槓桿率26.4倍（有效11.3倍）。
睇日圓兌美元回落，買「美日C輪4654」，5月底到期，輪價9.6仙，溢價6.6%，槓桿率81倍（有效23.9倍）。
日圓兩隻滙價輪，都嫌溢價高，但輪價一樣會有波動，因為日圓滙價好波動。
章盛