𠵱家全城最熱烘烘，莫過於齊齊為大海嘯居民賑災。不過，原來就算你想捐，人哋未必肯受，好似無國界醫生就唔收由跨政黨及團體收集到嘅捐款。
話說噚日民主黨李永達決定同自由黨田少、重有醫學會等團體搞籌款，田少又拍心口話一、兩千萬梗有，諗住唔好淨係捐畀樂施會同宣明會，於是聯絡其他志願機構，但無國界醫生第一句說話就係三不收：一不收政府錢、二不收政黨錢、三不收油公司錢。
事後民主派同其他團體聽到「三不收」，都好唔妥，大班就話咁即係政黨唔收得，煙草商捐錢反而收得，有冇搞錯？有熟悉社福界嘅民主派人士話，其實佢哋唔係淨係政黨，冇理由唔收，不過𠵱家周街都係捐款，再加埋無國界醫生有唔少內地計劃，可能唔想同民主派有關係啩！不過無所謂啦，反正重有其他機構肯收，咪捐畀其他人囉！
傳真︰2623-9278
電郵︰