今晚「陳慧琳紙醉金迷演唱會」已經踏入第七場，陳慧琳（Kelly）會喺紅館同現場觀眾一齊倒數，慶祝○五年嘅來臨，贊助商又會送出啲金雞畀觀眾，做新年禮物，實行皆大歡喜。
原來今次Kelly嘅演唱會製造咗唔少就業機會畀啲年輕人，好似喺紅館門外嘅義賣攤位嘅員工，都係由就業培訓計劃入面挑選出嚟，而今次有份表演嘅八十個舞蹈員之中，有一半係嚟自唔同地區嘅青少年中心。
Kelly咁大膽畀佢哋上台表演，都係希望可以提供多啲機會畀年輕人，等佢哋可以發揮多方面才能，Kelly真不愧係世界傑青，坐言起行關注青少年就業問題。Kelly對此就話：「自己十幾歲嘅時候好怕醜，從來都冇諗過踏足紅館。班年輕人既然有能力，又有膽識，點解唔畀個機會佢哋呢！」而前晚嘅演唱會，余文樂都去咗捧場。
黎明（Leon）噚日已經啓程到北京，出席今晚喺北京釣魚台國賓館舉行嘅大型文藝晚會，聯同S.H.E、蘇慧倫等各地嘅歌手齊齊倒數，迎接○五年嘅來臨，一踏入凌晨十二點，Leon就會獻唱《兩個人的煙火》，今次係Leon第一次參與呢類型嘅倒數活動，而且可以返到家鄉北京迎新年，雖然都係喺工作中度過，但佢話感覺比以前溫暖。
沈嘉偉、邱淑貞（豆斗）兩夫婦前晚帶埋個女喺日本返香港，但就唔見豆斗幾個月大嘅細女，豆斗話今次只係去咗東京，不過佢睇電視都知道海嘯災難，但就話佢哋一家平時好少踏足東南亞地方喎。而梁洛施前晚就喺上海返港，佢話今次係去為洗頭水廣告試造型，下個禮拜要再去上海拍。
蔡少芬（Ada）同黃子華第一次合作拍劇，叫好又叫座，《棟篤神探》重係今年收視之冠，Ada噚日喺電視城笑住咁話老懷安慰：「第一次我哋合作就有咁嘅成績，希望以後可以再有機會合作。」至於子華就話收視咁勁，連自己都估唔倒，佢話：「真係估唔到，但係我覺得自己係可以做得好啲，未夠盡善盡美。」
謝婷婷日前剛被周刊影到佢同施念慈前夫陳鴻業拖手夜蒲嘅照片，噚日凌晨佢又同朋友去中環嘅Dragoni酒吧消遣，被一名記者喺店內用相機偷拍，但被該店負責人發現，要求記者拆菲林不果後報警。警方接報後到場，雙方最終和解，警方就將案件列作糾紛案處理。
吳倩蓮獲邀接拍內地三十集電視劇《阮玲玉》，前日小倩喺內地出席《阮》劇見面會，佢提到今次演出嘅負擔好重，因為今次係佢從影以嚟第一次演一個真正存在過嘅人物，加上阮玲玉係一個充滿悲劇色彩嘅女影星，喺每個人心目中嘅感覺都唔同，所以就難上加難。但係小倩最擔心嘅原來係要由阮玲玉十六歲演到二十五歲，佢怕自己年紀過大，將角色演得過老。
