今年喺日本火速上位嘅性感女星岩佐真悠子，狂出寫真集之餘，重孭飛拍劇集《DEEPLOVE》。臨近年尾，岩佐應最新一期日本雜誌《EX.Flash》嘅邀請，着上性感花花水着寫大字，向男fans預祝新一年順順利利、身壯力健。
第一次擔起支大毛筆寫字嘅岩佐話，雖然平日見人哋用大毛筆好似好輕鬆，但估唔到原來支筆咁重。岩佐最後搞到手手腳腳都沾滿晒墨水，但佢就一啲都唔介意，重話為咗回饋fans過去一年嘅鼎力支持，再污糟都值得，岩佐咁抵得諗，難怪佢咁得fans歡心啦。
除咗寫大字外，岩佐重好大方咁公開咗佢細個嗰陣嘅相片。原來讀小學嘅時候，岩佐曾經由佢爸爸操刀，剪咗個冬菇頭，加埋佢嗰對圓碌碌嘅大眼睛，真係非常得意。不過有兩個阿哥嘅岩佐原來細個非常男仔頭，唔單止成日模仿阿哥講嘢，搞到每年家長會都俾老師投訴佢講說話粗魯，又經常同阿哥打交，養成佢好勝唔認輸嘅性格。所以，岩佐話若然要揀男朋友，佢就鍾意有男人味、重要叻過佢嘅男仔。